kitab-e-hijr mein ek harf-e-na-rasa ki tarah

kitāb-e-hijr meñ ik harf-e-nā-rasā kī tarah

mujhe bhī likhe koī john fāriha kī tarah

bhale ye haath bañdhe haiñ magar ye kājal hai

so phail jaatā hai ik kāsa-e-gadā kī tarah

vo mujh se miltā thā har baar apnī shartoñ par

kabhī ḳhatā kī tarah aur kabhī sazā kī tarah

mujhe satātī raheñ titliyāñ sharārat se

guloñ kī baat vo kartā rahā sabā kī tarah

jo baat kartā thā mujh se mire hī lahje meñ

na aayā lauT ke vāpas mirī sadā kī tarah

ye baat tai thī ki rahnā hai ajnabī ban kar

so oḌh lī tirī begānagī ridā kī tarah

hamāre biich agar kuchh nahīñ to phir kyā hai

nibhāte rahte haiñ donoñ jise vafā kī tarah

mujhe hī jaldī thī kuchh kaam aur nipTā luuñ

vo aa ke baiThā thā achchhā bhalā sadā kī tarah

kisī ke hāthoñ kī garmī se jab milī ThanDak

tū yaad aa ga.ī 'sīmā' mujhe rasā kī tarah

kitab-e-hijr mein ek harf-e-na-rasa ki tarah

mujhe bhi likhe koi john fariha ki tarah

bhale ye hath bandhe hain magar ye kajal hai

so phail jata hai ek kasa-e-gada ki tarah

wo mujh se milta tha har bar apni sharton par

kabhi KHata ki tarah aur kabhi saza ki tarah

mujhe satati rahen titliyan shararat se

gulon ki baat wo karta raha saba ki tarah

jo baat karta tha mujh se mere hi lahje mein

na aaya lauT ke wapas meri sada ki tarah

ye baat tai thi ki rahna hai ajnabi ban kar

so oDh li teri beganagi rida ki tarah

hamare bich agar kuchh nahin to phir kya hai

nibhate rahte hain donon jise wafa ki tarah

mujhe hi jaldi thi kuchh kaam aur nipTa lun

wo aa ke baiTha tha achchha bhala sada ki tarah

kisi ke hathon ki garmi se jab mili ThanDak

tu yaad aa gai 'sima' mujhe rasa ki tarah