kitab-e-ishq ki sharh-e-matin tak pahunchun

kitāb-e-ishq kī sharh-e-matīn tak pahuñchūñ

kabhī to mansab-e-a.alā-tarīn tak pahuñchūñ

uḌaa.e phirtī hai mujh ko anā fazāoñ meñ

bhalā maiñ kaise vafā kī zamīn tak pahuñchūñ

mujhe vo mai to pilā de ki be-ḳhudī meñ bhī

rumūz-e-hastī-e-kāmil-yaqīn tak pahuñchūñ

hazār ḳhūbiyāñ mujh meñ haiñ rashk ke qābil

hai merā azm ki maiñ behtarīn tak pahuñchūñ

sunā hai maiñ ne bahut tū hasīñ hai ai duniyā

maiñ chāhtā huuñ ki tujh se hasīn tak pahuñchūñ

mujhe yaqīn hai tū un ke saath rahtā hai

mirī bisāt kahāñ sābirīn tak pahuñchūñ

ibādatoñ kā banūñ nuur is tarah 'anvar'

nishān ban ke kisī kī jabīn tak pahuñchūñ

kitab-e-ishq ki sharh-e-matin tak pahunchun

kabhi to mansab-e-ala-tarin tak pahunchun

uDae phirti hai mujh ko ana fazaon mein

bhala main kaise wafa ki zamin tak pahunchun

mujhe wo mai to pila de ki be-KHudi mein bhi

rumuz-e-hasti-e-kaamil-yaqin tak pahunchun

hazar KHubiyan mujh mein hain rashk ke qabil

hai mera azm ki main behtarin tak pahunchun

suna hai main ne bahut tu hasin hai ai duniya

main chahta hun ki tujh se hasin tak pahunchun

mujhe yaqin hai tu un ke sath rahta hai

meri bisat kahan sabirin tak pahunchun

ibaadaton ka banun nur is tarah 'anwar'

nishan ban ke kisi ki jabin tak pahunchun