kitab-e-umr mein ek wo bhi bab hota hai

kitāb-e-umr meñ ik vo bhī baab hotā hai

har ik savāl jahāñ lā-javāb hotā hai

maiñ pī gayā huuñ yahī soch kar tire aañsū

hasīn āñkhoñ kā paanī sharāb hotā hai

mire bhī haath meñ aayā thā jaam TuuT gayā

kisī kisī kā muqaddar ḳharāb hotā hai

laboñ se harf-e-mohabbat adā nahīñ hotā

nazar nazar se savāl-o-javāb hotā hai

kisī ke dard ko samjho kisī kā ġham le lo

kisī kā haath baTānā savāb hotā hai

kabhī vo jāgtā rahtā hai soī āñkhoñ meñ

kabhī vo jāgtī āñkhoñ kā ḳhvāb hotā hai

makīñ ban ke yahāñ kaun aa.egā 'sīmāb'

dil-e-shikasta makān-e-ḳharāb hotā hai

kitab-e-umr mein ek wo bhi bab hota hai

har ek sawal jahan la-jawab hota hai

main pi gaya hun yahi soch kar tere aansu

hasin aankhon ka pani sharab hota hai

mere bhi hath mein aaya tha jam TuT gaya

kisi kisi ka muqaddar KHarab hota hai

labon se harf-e-mohabbat ada nahin hota

nazar nazar se sawal-o-jawab hota hai

kisi ke dard ko samjho kisi ka gham le lo

kisi ka hath baTana sawab hota hai

kabhi wo jagta rahta hai soi aankhon mein

kabhi wo jagti aankhon ka KHwab hota hai

makin ban ke yahan kaun aaega 'simab'

dil-e-shikasta makan-e-KHarab hota hai