kitab-e-zist ka dhundla cower utarte hain

kitāb-e-zīst kā dhuñdlā cover utārte haiñ

ab is maqām pe gard-e-safar utārte haiñ

ḳhizāñ kā jo bhī huā thā asar utārte haiñ

chaman ke phuul chaman kī nazar utārte haiñ

dikhā.eñ kaise manāzir ufaq ke āñkhoñ ko

chalo zamīn pe shams-o-qamar utārte haiñ

lahū meñ utrā hai aaseb is liye ham ab

lahū nichoḌ ke har ek shar utārte haiñ

ik āsmān jise kah rahe haiñ log abhī

kaheñge kyā vo zamīñ par agar utārte haiñ

agar ki ḳhvāb kī tā۔bīr dekhnī ho hameñ

to pahle aañkh se saare bhañvar utārte haiñ

ġham-e-jahān ġham-e-yār do kināre haiñ

to dekhiye ye thapeḌe kidhar utārte haiñ

ḳhud apne hone se inkār kar diyā ham ne

yuuñ apne hone kā is dil se Dar utārte haiñ

phir ek din mujhe tajsīm kar ke bolā 'azān'

ham apne fan meñ faqat bā-hunar utārte haiñ

kitab-e-zist ka dhundla cower utarte hain

ab is maqam pe gard-e-safar utarte hain

KHizan ka jo bhi hua tha asar utarte hain

chaman ke phul chaman ki nazar utarte hain

dikhaen kaise manazir ufaq ke aankhon ko

chalo zamin pe shams-o-qamar utarte hain

lahu mein utra hai aaseb is liye hum ab

lahu nichoD ke har ek shar utarte hain

ek aasman jise kah rahe hain log abhi

kahenge kya wo zamin par agar utarte hain

agar ki KHwab ki ta۔bir dekhni ho hamein

to pahle aankh se sare bhanwar utarte hain

gham-e-jahan gham-e-yar do kinare hain

to dekhiye ye thapeDe kidhar utarte hain

KHud apne hone se inkar kar diya hum ne

yun apne hone ka is dil se Dar utarte hain

phir ek din mujhe tajsim kar ke bola 'azan'

hum apne fan mein faqat ba-hunar utarte hain