kitna be-rang hua shahr-e-hunar tere baad

kitnā be-rang huā shahr-e-hunar tere baad

jaane kis ruḳh pe ho lafzoñ kā safar tere baad

kaun ab lab ke tabassum ko kahegā hiirā

kaun barsā.egā lafzoñ ke guhar tere baad

jab bhī girtā hai baḌā peḌ dahaltī hai zamīñ

zindagī dhuup meñ guzregī shajar tere baad

kahkashāñ lafzoñ kī sheroñ meñ milegī kis ke

kaun bāñTegā ḳhayāloñ ke guhar tere ba.ad

sadiyoñ rakkhegī tujhe zinda suḳhan kī ḳhushbū

tazkire hoñge tire shām-o-sahar tere baad

silsila kaun sañbhālegā nuqūsh-e-pā kā

muntazir kis kī hai ab rāhguzar tere baad

ab kahāñ hote haiñ vo sher-o-suḳhan ke charche

be-zabāñ ho gayā tahzīb kā ghar tere baad

munfarid jur.at-e-iz.hār rahegī zinda

ab kahāñ hogā ye uslūb-o-hunar tere baad

tere ash.ār pe sar dhuntī rahegī duniyā

rang laayā hai tirā ḳhūn-e-jigar tere baad

garmī-e-fikr-e-suḳhan se nahīñ inkār 'nazar'

itnī āsāñ bhī nahīñ rāh-guzar tere baad

kitna be-rang hua shahr-e-hunar tere baad

jaane kis ruKH pe ho lafzon ka safar tere baad

kaun ab lab ke tabassum ko kahega hira

kaun barsaega lafzon ke guhar tere baad

jab bhi girta hai baDa peD dahalti hai zamin

zindagi dhup mein guzregi shajar tere baad

kahkashan lafzon ki sheron mein milegi kis ke

kaun banTega KHayalon ke guhar tere baad

sadiyon rakkhegi tujhe zinda suKHan ki KHushbu

tazkire honge tere sham-o-sahar tere baad

silsila kaun sanbhaalega nuqush-e-pa ka

muntazir kis ki hai ab rahguzar tere baad

ab kahan hote hain wo sher-o-suKHan ke charche

be-zaban ho gaya tahzib ka ghar tere baad

munfarid jurat-e-izhaar rahegi zinda

ab kahan hoga ye uslub-o-hunar tere baad

tere ashaar pe sar dhunti rahegi duniya

rang laya hai tera KHun-e-jigar tere baad

garmi-e-fikr-e-suKHan se nahin inkar 'nazar'

itni aasan bhi nahin rah-guzar tere baad