kitna main aur chal ke dikhaun mere KHuda

kitnā maiñ aur chal ke dikhā.ūñ mire ḳhudā

dukhne lage haiñ ab mire paañv mire ḳhudā

har pal kī dhuup mere badan ko jalā na de

likh de mire nasīb meñ chhāñv mire ḳhudā

phir kyā mujhe parinde banā leñge apnā dost

ghar meñ agar maiñ peḌ lagā.ūñ mire ḳhudā

har shaḳhs apne aap meñ gum ho ke rah gayā

aise meñ ab maiñ kis ko bulā.ūñ mire ḳhudā

so.e nahīñ ye log to murda haiñ sab ke sab

in ko batā maiñ kaise jagā.ūñ mire ḳhudā

tujh ko ye nāgavār guzarnā hai varna maiñ

shikva karūñ tamāshā lagā.ūñ mire ḳhudā

koshish yahī hai merī jahāñ bhī añdherā ho

pahlā diyā vahāñ maiñ jalā.ūñ mire ḳhudā

kitna main aur chal ke dikhaun mere KHuda

dukhne lage hain ab mere panw mere KHuda

har pal ki dhup mere badan ko jala na de

likh de mere nasib mein chhanw mere KHuda

phir kya mujhe parinde bana lenge apna dost

ghar mein agar main peD lagaun mere KHuda

har shaKHs apne aap mein gum ho ke rah gaya

aise mein ab main kis ko bulaun mere KHuda

soe nahin ye log to murda hain sab ke sab

in ko bata main kaise jagaun mere KHuda

tujh ko ye nagawar guzarna hai warna main

shikwa karun tamasha lagaun mere KHuda

koshish yahi hai meri jahan bhi andhera ho

pahla diya wahan main jalaun mere KHuda