kitna zalim meri chahat ka muqaddar nikla

kitnā zālim mirī chāhat kā muqaddar niklā

maiñ jise aa.ina samjhā thā vo patthar niklā

sej phūloñ kī samajhtā thā tire saath jise

terī furqat meñ vo kāñToñ-bharā bistar niklā

yād-e-jānāñ meñ lagī dhuup bhī saa.e kī tarah

yād-e-jānāñ meñ kabhī ghar se jo bāhar niklā

haiñ hasīñ aur bhī lekin jise chāhā maiñ ne

merī nazroñ meñ vo har ek se baḌh kar niklā

jo ki dozaḳh thī vo jannat nazar aa.ī duniyā

jab bhī mai-ḳhāne se bāhar kabhī pī kar niklā

ishq-e-lailā ke sabab ho gayā kitnā mash.hūr

qais bhī kitnā muqaddar kā sikandar niklā

naaz thā mujh ko bahut apnī anā par lekin

ḳhud ko jab parkhā to maiñ auroñ se kamtar niklā

duur se mujh ko samundar bhī lagā misl-e-sarāb

paas se dekhā to qatra bhī samundar niklā

kaun ḳhush-baḳht zamāne se aTā hai yaaro

tazkira kis kī ajal kā hai jo ghar ghar niklā

chashm-e-bīnā se 'zafar' dekhā to mahsūs huā

ya.anī har zarra bhī ḳhurshīd kā paikar niklā

kitna zalim meri chahat ka muqaddar nikla

main jise aaina samjha tha wo patthar nikla

sej phulon ki samajhta tha tere sath jise

teri furqat mein wo kanTon-bhara bistar nikla

yaad-e-jaanan mein lagi dhup bhi sae ki tarah

yaad-e-jaanan mein kabhi ghar se jo bahar nikla

hain hasin aur bhi lekin jise chaha main ne

meri nazron mein wo har ek se baDh kar nikla

jo ki dozaKH thi wo jannat nazar aai duniya

jab bhi mai-KHane se bahar kabhi pi kar nikla

ishq-e-laila ke sabab ho gaya kitna mashhur

qais bhi kitna muqaddar ka sikandar nikla

naz tha mujh ko bahut apni ana par lekin

KHud ko jab parkha to main auron se kamtar nikla

dur se mujh ko samundar bhi laga misl-e-sarab

pas se dekha to qatra bhi samundar nikla

kaun KHush-baKHt zamane se aTa hai yaro

tazkira kis ki ajal ka hai jo ghar ghar nikla

chashm-e-bina se 'zafar' dekha to mahsus hua

yani har zarra bhi KHurshid ka paikar nikla