kitne dil TuTe hain duniya ka KHabar hone tak

kitne dil TuuTe haiñ duniyā kā ḳhabar hone tak

kitne sar phūTe haiñ dīvār meñ dar hone tak

ek kāñTā jo nikaltā hai to sau chubhte haiñ

amn thā hausla-e-fikr-o-nazar hone tak

ham ne apne se bhī sau baar mohabbat kī hai

haañ magar dil meñ kisī shoḳh kā ghar hone tak

ab kahīñ raqs-e-junūñ hai to kahīñ naġhma-e-ḳhūñ

kitnī suunī thī fazā zer-o-zabar hone tak

aaj suntā huuñ vahī naqsh-e-qadam chūmte haiñ

jo bahut ḳhush the mire shahr-badar hone tak

āñkhoñ āñkhoñ meñ bhī kaT jaa.e to ham raazī haiñ

ye añdhere hai bas ik raat basar hone tak

jab jhulas degā zamāna to na ummīd na yaas

shāḳh ko ḳhauf hai be-barg-o-samar hone tak

is qayāmat kā jo pūchho to koī naam nahīñ

ham pe jo biit ga.ī tum ko ḳhabar hone tak

ik kiran phūTegī ik shoḳh havā sankegī

isī ummīd meñ jaage haiñ sahar hone tak

aur ik nāra-e-mastāna ki mahfil jaage

aur ik jaam zamāne ko ḳhabar hone tak

un ke hoñToñ pe vo ma.asūm tabassum kī shaguft

sho.la-e-narm banī lams-e-nazar hone tak

merī barbādī bhī ik hashr hai lekin 'zaidī'

irtiqā raqs meñ hai hashr-e-digar hone tak

kitne dil TuTe hain duniya ka KHabar hone tak

kitne sar phuTe hain diwar mein dar hone tak

ek kanTa jo nikalta hai to sau chubhte hain

amn tha hausla-e-fikr-o-nazar hone tak

hum ne apne se bhi sau bar mohabbat ki hai

han magar dil mein kisi shoKH ka ghar hone tak

ab kahin raqs-e-junun hai to kahin naghma-e-KHun

kitni suni thi faza zer-o-zabar hone tak

aaj sunta hun wahi naqsh-e-qadam chumte hain

jo bahut KHush the mere shahr-badar hone tak

aankhon aankhon mein bhi kaT jae to hum raazi hain

ye andhere hai bas ek raat basar hone tak

jab jhulas dega zamana to na ummid na yas

shaKH ko KHauf hai be-barg-o-samar hone tak

is qayamat ka jo puchho to koi nam nahin

hum pe jo bit gai tum ko KHabar hone tak

ek kiran phuTegi ek shoKH hawa sankegi

isi ummid mein jage hain sahar hone tak

aur ek nara-e-mastana ki mahfil jage

aur ek jam zamane ko KHabar hone tak

un ke honTon pe wo masum tabassum ki shaguft

shola-e-narm bani lams-e-nazar hone tak

meri barbaadi bhi ek hashr hai lekin 'zaidi'

irtiqa raqs mein hai hashr-e-digar hone tak