kitne haqaeq ke chehre ru-posh mile afsanon mein

kitne haqā.eq ke chehre rū-posh mile afsānoñ meñ

aksar apnā-pan dekhā hai begānoñ an-jānoñ meñ

jaate jaate husn-e-nazar se pyaar ke phuul khilāte jaao

varna din kaise guzreñge ziist ke in vīrānoñ meñ

zehn ke goshe-goshe meñ ehsās kī kircheñ chubhtī haiñ

karb kī sahbā Dhalne lagī hai lafzoñ ke paimānoñ meñ

chehroñ ke ā.īne bhī ab dil kī baat nahīñ kahte

ab to koī farq nahīñ hai apnoñ aur begānoñ meñ

shīsh-mahal meñ baiTh ke patthar pheñk rahe haiñ duniyā par

shāyad yuuñ hī naam tumhārā aa jaa.e farzānoñ meñ

taaza havā aur dhuup kisī taḳhrīb kā baa.is ban na sakīñ

koī aaḌ lagā do ghar ke saare raushan-dānoñ meñ

aap kī fahm-o-farāsat ke afsāne aam haiñ har jānib

aap bhalā kyoñ aa baiThe ham ḳhāk-basar dīvānoñ meñ

'mehdī' chauñkā detā hai andāz tumhārī ġhazloñ kā

lafz-o-bayāñ kā jaadū kaisā ras ghole hai kānoñ meñ

kitne haqaeq ke chehre ru-posh mile afsanon mein

aksar apna-pan dekha hai beganon an-jaanon mein

jate jate husn-e-nazar se pyar ke phul khilate jao

warna din kaise guzrenge zist ke in viranon mein

zehn ke goshe-goshe mein ehsas ki kirchen chubhti hain

karb ki sahba Dhalne lagi hai lafzon ke paimanon mein

chehron ke aaine bhi ab dil ki baat nahin kahte

ab to koi farq nahin hai apnon aur beganon mein

shish-mahal mein baiTh ke patthar phenk rahe hain duniya par

shayad yun hi nam tumhaara aa jae farzanon mein

taza hawa aur dhup kisi taKHrib ka bais ban na sakin

koi aaD laga do ghar ke sare raushan-danon mein

aap ki fahm-o-farasat ke afsane aam hain har jaanib

aap bhala kyon aa baiThe hum KHak-basar diwanon mein

'mehdi' chaunka deta hai andaz tumhaari ghazlon ka

lafz-o-bayan ka jadu kaisa ras ghole hai kanon mein