kitne imkan the jo KHwabon ke sahaare dekhe

kitne imkāñ the jo ḳhvāboñ ke sahāre dekhe

māvarā the jo nazar se vo nazāre dekhe

parde uThte ga.e āñkhoñ se to rafta rafta

barg-e-gul barf meñ patthar meñ sharāre dekhe

dil pe us vaqt khulā hausla-e-ġham kā jamāl

apne har rañg meñ jab ruup tumhāre dekhe

āsare jaate rahe aas abhī baaqī hai

pau bhī phūTegī jahāñ Dūbte taare dekhe

dil ko ḳhuuñ karne kī hasrat ho use bhī shāyad

sāhab-e-sāda agar rañg hamāre dekhe

ḳhūb-o-nā-ḳhūb meñ kyā farq kareñ ham ki yahāñ

jab havā palTī to muḌte hue dhāre dekhe

mujhe is bazm meñ kahnā to bahut kuchh thā 'ziyā'

bujh ga.e lafz jab āñkhoñ ke ishāre dekhe

kitne imkan the jo KHwabon ke sahaare dekhe

mawara the jo nazar se wo nazare dekhe

parde uThte gae aankhon se to rafta rafta

barg-e-gul barf mein patthar mein sharare dekhe

dil pe us waqt khula hausla-e-gham ka jamal

apne har rang mein jab rup tumhaare dekhe

aasare jate rahe aas abhi baqi hai

pau bhi phuTegi jahan Dubte tare dekhe

dil ko KHun karne ki hasrat ho use bhi shayad

sahab-e-sada agar rang hamare dekhe

KHub-o-na-KHub mein kya farq karen hum ki yahan

jab hawa palTi to muDte hue dhaare dekhe

mujhe is bazm mein kahna to bahut kuchh tha 'ziya'

bujh gae lafz jab aankhon ke ishaare dekhe