kitne KHayal raat ki palkon mein aae the

kitne ḳhayāl raat kī palkoñ meñ aa.e the

kirnoñ ne sab charāġh savere bujhā.e the

chalnā paḌā havā ko bhī dāman sañbhāl kar

phūloñ ke saath raah meñ kāñTe bichhā.e the

paanī bachā ke rakh liyā vīrāniyoñ ke biich

kis ne hazāroñ kos se panchhī bulā.e the

sarsabz vo hī peḌ huā moḌ kī tarah

jis ne havā meñ pankh se patte uḌaa.e the

rasm-o-rivāj kī amar beloñ ne Das liyā

ham ne azal se ḳhud hī ye bandhan banā.e the

taare ga.e kahāñ ye vahīñ ke vahīñ rahe

din se chhupā.e jo vahī shab ne dikhā.e the

badle libās aadmī har rut ke rang meñ

patthar ke yug meñ aaj ke kapḌe silā.e the

bāhar faqīr ne kahīñ Derā lagā liyā

bāzār saare shahr ke ham ne sajā.e the

alfāz kā hujūm thā pahchānte kise

kitne hī bin bulā.e kitāboñ meñ aa.e the

kitne KHayal raat ki palkon mein aae the

kirnon ne sab charagh sawere bujhae the

chalna paDa hawa ko bhi daman sanbhaal kar

phulon ke sath rah mein kanTe bichhae the

pani bacha ke rakh liya viraniyon ke bich

kis ne hazaron kos se panchhi bulae the

sarsabz wo hi peD hua moD ki tarah

jis ne hawa mein pankh se patte uDae the

rasm-o-riwaj ki amar belon ne Das liya

hum ne azal se KHud hi ye bandhan banae the

tare gae kahan ye wahin ke wahin rahe

din se chhupae jo wahi shab ne dikhae the

badle libas aadmi har rut ke rang mein

patthar ke yug mein aaj ke kapDe silae the

bahar faqir ne kahin Dera laga liya

bazar sare shahr ke hum ne sajae the

alfaz ka hujum tha pahchante kise

kitne hi bin bulae kitabon mein aae the