kitne ujaD gae hain chaman ku-e-yar mein

kitne ujaḌ ga.e haiñ chaman kū-e-yār meñ

kaisī havā.eñ ab ke chalī haiñ bahār meñ

duniyā haqīr jaan ke nazreñ na pher le

thoḌī sī lāzmī hai anā inkisār meñ

zarroñ se aa rahī hai vafā-dāriyoñ kī bū

shāyad mirā lahū hai terī rahguzār meñ

ilzām ā.inoñ pe lagāte ho kis liye

chehra aTā huā hai tumhārā ġhubār meñ

māñDū kī sarzamīn ko samjho na be-samar

tārīḳh ke gulāb haiñ ujḌe dayār meñ

āñkhoñ meñ qaid karne kī koshish fuzūl hai

aañsū nahīñ rahe haiñ mire iḳhtiyār meñ

shāyad ki kal zamīñ pe khileñ amn ke gulāb

har pal guzar rahā hai isī intizār meñ

'sarvat' jahān-e-ilm meñ kuchh kam-nasīb log

ab tak paḌe hue haiñ jahālat ke ġhaar meñ

kitne ujaD gae hain chaman ku-e-yar mein

kaisi hawaen ab ke chali hain bahaar mein

duniya haqir jaan ke nazren na pher le

thoDi si lazmi hai ana inkisar mein

zarron se aa rahi hai wafa-dariyon ki bu

shayad mera lahu hai teri rahguzar mein

ilzam aainon pe lagate ho kis liye

chehra aTa hua hai tumhaara ghubar mein

manDu ki sarzamin ko samjho na be-samar

tariKH ke gulab hain ujDe dayar mein

aankhon mein qaid karne ki koshish fuzul hai

aansu nahin rahe hain mere iKHtiyar mein

shayad ki kal zamin pe khilen amn ke gulab

har pal guzar raha hai isi intizar mein

'sarwat' jahan-e-ilm mein kuchh kam-nasib log

ab tak paDe hue hain jahaalat ke ghaar mein