kitni bhali hai duniya ya phir buri hai duniya

kitnī bhalī hai duniyā yā phir burī hai duniyā

jaisā mizāj merā vaisī lagī hai duniyā

is ke sañvārne meñ hālat bigaḌ rahī hai

jo dā.imī Thikāna vo dūsrī hai duniyā

dil se nikālne meñ taklīf ho rahī hai

kin muddatoñ se mere dil meñ rahī hai duniyā

nīchī nigāh rakhnā dāman bachā ke chalnā

kāñToñ bharī añdherī TeḌhī galī hai duniyā

rakhtā hai yaad rab ko kab kab kahāñ kahāñ tū

bas dekh le yahī tū kaisī sajī hai duniyā

a.amāl kī zabāñ se jo haiñ ḳhudā ke munkir

un ke liye to āḳhir sab kuchh yahī hai duniyā

ma.asūmiyat ko apnī jis ne javān rakkhā

us ke liye to yaaro būḌhī baḌī hai duniyā

qudrat kī ne.amatoñ kā inkār kyoñ karūñ maiñ

uqbā sañvārne ko mujh ko milī hai duniyā

maiñ jo bhalā huuñ 'maḳhfī' saare bhale lage haiñ

kyūñkar kahūñ bhalā maiñ kitnī burī hai duniyā

kitni bhali hai duniya ya phir buri hai duniya

jaisa mizaj mera waisi lagi hai duniya

is ke sanwarne mein haalat bigaD rahi hai

jo daimi Thikana wo dusri hai duniya

dil se nikalne mein taklif ho rahi hai

kin muddaton se mere dil mein rahi hai duniya

nichi nigah rakhna daman bacha ke chalna

kanTon bhari andheri TeDhi gali hai duniya

rakhta hai yaad rab ko kab kab kahan kahan tu

bas dekh le yahi tu kaisi saji hai duniya

aamal ki zaban se jo hain KHuda ke munkir

un ke liye to aaKHir sab kuchh yahi hai duniya

masumiyat ko apni jis ne jawan rakkha

us ke liye to yaro buDhi baDi hai duniya

qudrat ki neamaton ka inkar kyon karun main

uqba sanwarne ko mujh ko mili hai duniya

main jo bhala hun 'maKHfi' sare bhale lage hain

kyunkar kahun bhala main kitni buri hai duniya