kitni bulandiyon pe sar-e-dar aae hain

kitnī bulandiyoñ pe sar-e-dār aa.e haiñ

kisī mārka meñ ahl-e-junūñ haar aa.e haiñ

ghabrā uThe haiñ zulmat-e-shab se to bār-hā

naale hamāre lab pe sharar-bār aa.e haiñ

ai qissa-go azal se jo biitī hai vo sunā

kuchh log tere fan ke parastār aa.e haiñ

paa.ī guloñ se ābla-pā.ī ki jab na daad

dīvāne haiñ ki sū-e-lab-e-ḳhār aa.e haiñ

ġham-ḳhvāriyoñ kī tah meñ dabī sī masarrateñ

yuuñ mere paas bhī mire ġham-ḳhvār aa.e haiñ

pahuñche haiñ jab bhī ḳhalvat-e-dil meñ to ai nadīm

aksar ham apne aap se be-zār aa.e haiñ

us bazm meñ to mai kā kahīñ zikr tak na thā

aur ham vahāñ se be-ḳhud o sarshār aa.e haiñ

us kī galī meñ ham ne luTā dī matā-e-jāñ

us kī galī se ham to subuksār aa.e haiñ

karte rahe haiñ fan kī parastish tamām umr

mahshar meñ kaise kaise gunahgār aa.e haiñ

'jazbī' jo ho sake to mirī hairatoñ se pūchh

kis tarah mere zehn meñ ash.ār aa.e haiñ

kitni bulandiyon pe sar-e-dar aae hain

kisi marka mein ahl-e-junun haar aae hain

ghabra uThe hain zulmat-e-shab se to bar-ha

nale hamare lab pe sharar-bar aae hain

ai qissa-go azal se jo biti hai wo suna

kuchh log tere fan ke parastar aae hain

pai gulon se aabla-pai ki jab na dad

diwane hain ki su-e-lab-e-KHar aae hain

gham-KHwariyon ki tah mein dabi si masarraten

yun mere pas bhi mere gham-KHwar aae hain

pahunche hain jab bhi KHalwat-e-dil mein to ai nadim

aksar hum apne aap se be-zar aae hain

us bazm mein to mai ka kahin zikr tak na tha

aur hum wahan se be-KHud o sarshaar aae hain

us ki gali mein hum ne luTa di mata-e-jaan

us ki gali se hum to subuksar aae hain

karte rahe hain fan ki parastish tamam umr

mahshar mein kaise kaise gunahgar aae hain

'jazbi' jo ho sake to meri hairaton se puchh

kis tarah mere zehn mein ashaar aae hain