kitni bulandiyon pe sar-e-dar aae hain

kitnī bulandiyoñ pe sar-e-dār aa.e haiñ

kis ma.arka meñ ahl-e-junūñ haar aa.e haiñ

ghabrā uThe haiñ zulmat-e-shab se to bār-hā

naale hamāre lab pe sharar-bār aa.e haiñ

ai qissa-go azal se jo biitī hai vo sunā

kuchh log tere fan ke parastār aa.e haiñ

paa.ī guloñ se ābla-pā.ī kī jab na daad

dīvāne haiñ ki sū-e-lab-e-ḳhār aa.e haiñ

ġham-ḳhvāriyoñ kī tah meñ dabī sī masarrateñ

yuuñ mere paas bhī mire ġham-ḳhvār aa.e haiñ

pahuñche haiñ jab bhī ḳhalvat-e-dil meñ to ai nadīm

aksar ham apne-āp se bezār aa.e haiñ

us bazm meñ to mai kā kahīñ zikr tak na thā

aur ham vahāñ se be-ḳhud o sarshār aa.e haiñ

kitni bulandiyon pe sar-e-dar aae hain

kis marka mein ahl-e-junun haar aae hain

ghabra uThe hain zulmat-e-shab se to bar-ha

nale hamare lab pe sharar-bar aae hain

ai qissa-go azal se jo biti hai wo suna

kuchh log tere fan ke parastar aae hain

pai gulon se aabla-pai ki jab na dad

diwane hain ki su-e-lab-e-KHar aae hain

gham-KHwariyon ki tah mein dabi si masarraten

yun mere pas bhi mere gham-KHwar aae hain

pahunche hain jab bhi KHalwat-e-dil mein to ai nadim

aksar hum apne-ap se bezar aae hain

us bazm mein to mai ka kahin zikr tak na tha

aur hum wahan se be-KHud o sarshaar aae hain