kitni sadiyon se lamhon ka loban jalta raha

kitnī sadiyoñ se lamhoñ kā lobān jaltā rahā

umr kā silsila saañs ban kar pighaltā rahā

nāptā rah gayā mauj se mauj kā fāsla

vaqt kā tez dariyā samundar meñ Dhaltā rahā

be-nishāñ manzileñ kis safar kī kahānī likhūñ

thak ga.ī soch har moḌ par zehn jaltā rahā

ajnabī rāstoñ kī taraf yuuñ na baḌhte qadam

gard ban kar ka.ī mere ham-rāh chaltā rahā

rut badalte hī dil meñ na.ī Tiis paidā huī

zahr-ālūd mausam meñ ik dard paltā rahā

gyaan kī aañch ne kar diyā masḳh merā vajūd

yā maiñ bargad ke saa.e meñ ḳhud ko badaltā rahā

dā.ere se nikal kar bhī maiñ dā.ere meñ thā qaid

phuul zaḳhmoñ ke chuntā rahā haath maltā rahā

kitni sadiyon se lamhon ka loban jalta raha

umr ka silsila sans ban kar pighalta raha

napta rah gaya mauj se mauj ka fasla

waqt ka tez dariya samundar mein Dhalta raha

be-nishan manzilen kis safar ki kahani likhun

thak gai soch har moD par zehn jalta raha

ajnabi raston ki taraf yun na baDhte qadam

gard ban kar kai mere ham-rah chalta raha

rut badalte hi dil mein nai Tis paida hui

zahr-alud mausam mein ek dard palta raha

gyan ki aanch ne kar diya masKH mera wajud

ya main bargad ke sae mein KHud ko badalta raha

daere se nikal kar bhi main daere mein tha qaid

phul zaKHmon ke chunta raha hath malta raha