kitni ThanDi thi hawa qarya-e-barfani ki

kitnī ThanDī thī havā qarya-e-barfānī kī

jam ga.ī dil meñ kasak shām-e-zamistānī kī

hādsa koī nayā raah pe guzrā hogā

dhuul har chehre pe bikhrī hai pareshānī kī

maiñ jahāñ jā.ūñ vahīñ maut kī tahvīl meñ huuñ

teġh ik laTkī hai har saañs pe nigrānī kī

mere tevar pe mirā nām-o-nasab kanda hai

dil kā ā.īna hai taḳhtī mirī peshānī kī

shāḳh-e-mizhgāñ pe lahakte hue ashkoñ ke gulāb

fasl panpī hai bahut ḳhitta-e-bārānī kī

kyā ḳhabar kis kā safīna sar-e-sāhil pahuñche

lahr ḳhatre se kahīñ ūñchī hai tuġhyānī kī

hāsil-e-kisht kī ho kaise tavaqqo 'rāsiḳh'

sūkhe nāloñ meñ kahīñ buuñd nahīñ paanī kī

kitni ThanDi thi hawa qarya-e-barfani ki

jam gai dil mein kasak sham-e-zamistani ki

hadsa koi naya rah pe guzra hoga

dhul har chehre pe bikhri hai pareshani ki

main jahan jaun wahin maut ki tahwil mein hun

tegh ek laTki hai har sans pe nigrani ki

mere tewar pe mera nam-o-nasab kanda hai

dil ka aaina hai taKHti meri peshani ki

shaKH-e-mizhgan pe lahakte hue ashkon ke gulab

fasl panpi hai bahut KHitta-e-barani ki

kya KHabar kis ka safina sar-e-sahil pahunche

lahr KHatre se kahin unchi hai tughyani ki

hasil-e-kisht ki ho kaise tawaqqo 'rasiKH'

sukhe nalon mein kahin bund nahin pani ki