kiya girdab mein jab bhi KHuda par aasra humne

kiyā girdāb meñ jab bhī ḳhudā par aasrā ham ne

bajā.e nāḳhudā paayā hai dil ko nāḳhudā ham ne

chaman meñ gul meñ ġhunche meñ shafaq meñ mehr-o-anjum meñ

tumhīñ ko jalva-gar dekhā zamīñ tā-āsmāñ ham ne

kuchh is sūrat se us jān-e-gulistāñ ne nazar pherī

zamāne bhar kī phir badlī huī dekhī havā ham ne

farishtoñ ne bhī jab roz-e-azal jur.at na kī hamdam

kamāl-e-ishq kā bār-e-garāñ sar par liyā ham ne

banīñ tīr-e-malāmat ishq kī ḳhuddāriyāñ aa kar

uThānā bhī kabhī chāhā agar dast-e-duā ham ne

musallam ho chukī jab husn kī ma.asūmiyat 'jauhar'

kiyā ham ne jo ulfat meñ kiyā achchhā burā ham ne

kiya girdab mein jab bhi KHuda par aasra hum ne

bajae naKHuda paya hai dil ko naKHuda hum ne

chaman mein gul mein ghunche mein shafaq mein mehr-o-anjum mein

tumhin ko jalwa-gar dekha zamin ta-asman hum ne

kuchh is surat se us jaan-e-gulistan ne nazar pheri

zamane bhar ki phir badli hui dekhi hawa hum ne

farishton ne bhi jab roz-e-azal jurat na ki hamdam

kamal-e-ishq ka bar-e-garan sar par liya hum ne

banin tir-e-malamat ishq ki KHuddariyan aa kar

uThana bhi kabhi chaha agar dast-e-dua hum ne

musallam ho chuki jab husn ki masumiyat 'jauhar'

kiya hum ne jo ulfat mein kiya achchha bura hum ne