kiye humne junun se nukta-chin-o-nukta-dan paida

kiye ham ne junūñ se nukta-chīn-o-nukta-dāñ paidā

ham aise aadmī hote haiñ duniyā meñ kahāñ paidā

hazāroñ bad-gumānī husn se ahl-e-havas ko haiñ

mohabbat ne kiyā hai husn se husn-e-gumāñ paidā

na hote ham to vo mā'būd-e-jān-o-dil kahāñ hote

jabīñ pahle huī paidā ki sang-e-āstāñ paidā

tabassum ban ga.ī un ke laboñ par har fuġhāñ merī

huī un ke tabassum se mire lab par fuġhāñ paidā

vahāñ jā kar haqīqat ruuh kī ham par huī zāhir

huī hai terī sūrat se jahāñ tasvīr-e-jāñ paidā

samajh ho to vahāñ phir kyoñ banā.e āshiyāñ koī

jahāñ bijlī kī qismat se ho shāḳh-e-āshiyāñ paidā

'zahīn' us qāfile kī gard chashm-e-dil kā surma hai

huī hai dil ke sahrā meñ jo gard-e-kārvāñ paidā

kiye hum ne junun se nukta-chin-o-nukta-dan paida

hum aise aadmi hote hain duniya mein kahan paida

hazaron bad-gumani husn se ahl-e-hawas ko hain

mohabbat ne kiya hai husn se husn-e-guman paida

na hote hum to wo ma'bud-e-jaan-o-dil kahan hote

jabin pahle hui paida ki sang-e-astan paida

tabassum ban gai un ke labon par har fughan meri

hui un ke tabassum se mere lab par fughan paida

wahan ja kar haqiqat ruh ki hum par hui zahir

hui hai teri surat se jahan taswir-e-jaan paida

samajh ho to wahan phir kyon banae aashiyan koi

jahan bijli ki qismat se ho shaKH-e-ashiyan paida

'zahin' us qafile ki gard chashm-e-dil ka surma hai

hui hai dil ke sahra mein jo gard-e-karwan paida