koi aabaad manzil hum jo viran dekh lete hain

koī ābād manzil ham jo vīrāñ dekh lete haiñ

ba-hasrat sū-e-charḳh-e-fitna-sāmāñ dekh lete haiñ

nazar husn āshnā Thahrī vo ḳhalvat ho ki jalvat ho

jab āñkheñ band kiiñ tasvīr-e-jānāñ dekh lete haiñ

shab-e-vāda hamesha se yahī māmūl hai apnā

sahar tak rāh-e-shoḳh-e-sust-paimāñ dekh lete haiñ

ḳhudā ne dī haiñ jin raushan-diloñ ko dūr-bīñ nazreñ

savād-e-kufr meñ vo nūr-e-īmāñ dekh lete haiñ

dil-e-betāb kā isrār maane sharm-e-rusvā.ī

bachā kar sab kī nazreñ sū-e-jānāñ dekh lete haiñ

vo ḳhud sar se qadam tak Duub jaate haiñ pasīne meñ

bharī mahfil meñ jo un ko pashīmāñ dekh lete haiñ

Tapak paḌte haiñ shabnam kī tarah be-iḳhtiyār aañsū

chaman meñ jab kabhī gul-hā-e-ḳhandāñ dekh lete haiñ

nigāh-e-nāz kī mastāna ye nishtar-zanī kaisī

ba-vaqt-e-fisd ragzan bhī rag-e-jāñ dekh lete haiñ

asīrān-e-sitam ke pāsbānoñ par haiñ tākīdeñ

badalte haiñ jo pahrā qufl-e-zindāñ dekh lete haiñ

'safī' rahte haiñ jaan o dil fidā karne pe āmāda

magar us vaqt jab insāñ ko insāñ dekh lete haiñ

koi aabaad manzil hum jo viran dekh lete hain

ba-hasrat su-e-charKH-e-fitna-saman dekh lete hain

nazar husn aashna Thahri wo KHalwat ho ki jalwat ho

jab aankhen band kin taswir-e-jaanan dekh lete hain

shab-e-wada hamesha se yahi mamul hai apna

sahar tak rah-e-shoKH-e-sust-paiman dekh lete hain

KHuda ne di hain jin raushan-dilon ko dur-bin nazren

sawad-e-kufr mein wo nur-e-iman dekh lete hain

dil-e-betab ka israr mane sharm-e-ruswai

bacha kar sab ki nazren su-e-jaanan dekh lete hain

wo KHud sar se qadam tak Dub jate hain pasine mein

bhari mahfil mein jo un ko pashiman dekh lete hain

Tapak paDte hain shabnam ki tarah be-iKHtiyar aansu

chaman mein jab kabhi gul-ha-e-KHandan dekh lete hain

nigah-e-naz ki mastana ye nishtar-zani kaisi

ba-waqt-e-fisd ragzan bhi rag-e-jaan dekh lete hain

asiran-e-sitam ke pasbanon par hain takiden

badalte hain jo pahra qufl-e-zindan dekh lete hain

'safi' rahte hain jaan o dil fida karne pe aamada

magar us waqt jab insan ko insan dekh lete hain