koi aaseb hai saya hai ki jadugar hai

koī aaseb hai saaya hai ki jādūgar hai

jaane kyā baat hai har shaḳhs ke dil meñ Dar hai

ek hī rele meñ bah jā.egī ḳhasta buniyād

sail-e-be-mehr ke shānoñ pe hamārā ghar hai

tere dil meñ bhī mohabbat kī harārat na rahī

merā sarmāya-e-ehsās bhī muTThī-bhar hai

sāneha hai ki hameñ luuTā gayā hai phir bhī

shahr luT jaane kā ilzām hamāre sar hai

jism ujḌī huī bastī kā khañDar lagtā hai

ruuh vīrān jazīroñ kī tarah banjar hai

mujhe dhaḌkā hai to bas TuuT ke gir jaane kā

soch kā koh-e-garāñ-bār mire sar par hai

jism andar se har ik lamha chaTaḳhtā hai 'niyāz'

yuuñ to qabroñ kī sī ḳhāmoshī mire bāhar hai

koi aaseb hai saya hai ki jadugar hai

jaane kya baat hai har shaKHs ke dil mein Dar hai

ek hi rele mein bah jaegi KHasta buniyaad

sail-e-be-mehr ke shanon pe hamara ghar hai

tere dil mein bhi mohabbat ki hararat na rahi

mera sarmaya-e-ehsas bhi muTThi-bhar hai

saneha hai ki hamein luTa gaya hai phir bhi

shahr luT jaane ka ilzam hamare sar hai

jism ujDi hui basti ka khanDar lagta hai

ruh viran jaziron ki tarah banjar hai

mujhe dhaDka hai to bas TuT ke gir jaane ka

soch ka koh-e-garan-bar mere sar par hai

jism andar se har ek lamha chaTaKHta hai 'niyaz'

yun to qabron ki si KHamoshi mere bahar hai