koi arman mere dil ka nikalne na diya

koī armān mire dil kā nikalne na diyā

shoḳhiyoñ ne tirī fiqra bhī to chalne na diyā

pai-ba-pai tīr-e-nazar aa.e sañbhalne na diyā

chāñdnī chauk se bismil ko nikalne na diyā

jab sisakne kā nahīñ hukm taḌapnā kaisā

itnā armān bhī qātil ne nikalne na diyā

bazm-e-hastī meñ abhī aa ke to ham baiThe the

yuuñ ajal aa.ī ki zaanū bhī badalne na diyā

shab-e-furqat se ho hāsil mujhe kis tarah najāt

saḳht-jānī ne mirā dam bhī nikalne na diyā

rahm kar parda-e-fānūs se ai sham.a nikal

is qadar zulm ki parvānoñ ko jalne na diyā

ye dabāyā qad-e-mauzūñ ne tire tuubā ko

bāġh-e-firdaus meñ bhī phūlne phalne na diyā

ḳhuub nazzāra-e-qātil rahā 'akbar' tah-e-teġh

haath ruk ruk gayā taqdīr ne chalne na diyā

koi arman mere dil ka nikalne na diya

shoKHiyon ne teri fiqra bhi to chalne na diya

pai-ba-pai tir-e-nazar aae sanbhalne na diya

chandni chauk se bismil ko nikalne na diya

jab sisakne ka nahin hukm taDapna kaisa

itna arman bhi qatil ne nikalne na diya

bazm-e-hasti mein abhi aa ke to hum baiThe the

yun ajal aai ki zanu bhi badalne na diya

shab-e-furqat se ho hasil mujhe kis tarah najat

saKHt-jaani ne mera dam bhi nikalne na diya

rahm kar parda-e-fanus se ai shama nikal

is qadar zulm ki parwanon ko jalne na diya

ye dabaya qad-e-mauzun ne tere tuba ko

bagh-e-firdaus mein bhi phulne phalne na diya

KHub nazzara-e-qatil raha 'akbar' tah-e-tegh

hath ruk ruk gaya taqdir ne chalne na diya