koi aur dastan thi dar-e-dastan se aage

koī aur dāstāñ thī dar-e-dāstāñ se aage

mujhe le gayā thā ik din koī āsmāñ se aage

mujhe kyā dikhā.ī detā ki har ik taraf dhuāñ thā

maiñ nikal gayā thā shāyad tirī kahkashāñ se aage

tire āstāñ se aage koī rāsta nahīñ hai

koī kaise jā sakegā tire āstāñ se aage

maiñ kabhī vahāñ se aage na gayā na jā sakūñgā

mujhe kuchh ḳhabar nahīñ hai ki hai kyā vahāñ se aage

kabhī thā yaqīñ ke pīchhe to kabhī gumāñ ke pīchhe

magar ab yaqīn merā hai mire gumāñ se aage

mujhe bas yahī pata hai ki the saath saath donoñ

huā maiñ kahāñ se pīchhe huā tū kahāñ se aage

koi aur dastan thi dar-e-dastan se aage

mujhe le gaya tha ek din koi aasman se aage

mujhe kya dikhai deta ki har ek taraf dhuan tha

main nikal gaya tha shayad teri kahkashan se aage

tere aastan se aage koi rasta nahin hai

koi kaise ja sakega tere aastan se aage

main kabhi wahan se aage na gaya na ja sakunga

mujhe kuchh KHabar nahin hai ki hai kya wahan se aage

kabhi tha yaqin ke pichhe to kabhi guman ke pichhe

magar ab yaqin mera hai mere guman se aage

mujhe bas yahi pata hai ki the sath sath donon

hua main kahan se pichhe hua tu kahan se aage