koi bach nahin pata aisa jal bunte hain

koī bach nahīñ paatā aisā jaal bunte haiñ

kaise kaise qisse ye māh-o-sāl bunte haiñ

jaane kitnī sadiyoñ se har baras ḳhizāñ-rut meñ

ḳhushk patte dhartī par zard shaal bunte haiñ

aaj kal na jaane kyuuñ zehn par tanāv hai

TūT-phūT jaatā hai jo ḳhayāl bunte haiñ

shahr vaale pochheñge kuchh sabab jaddā.ī kā

ghar ke ḳhālī kone bhī kuchh savāl bunte haiñ

hijr ke manāzir ko bhūlnā hī behtar hai

pyaar kī tanāboñ se phir visāl bunte haiñ

halqa-e-mohabbat meñ jo nazīr ban jaa.e

aao ham vafāoñ kī vo misāl bunte haiñ

ab purānī bātoñ ko kyā kurednā 'shāhid'

bhuul kar guzashta ko apnā haal bunte haiñ

koi bach nahin pata aisa jal bunte hain

kaise kaise qisse ye mah-o-sal bunte hain

jaane kitni sadiyon se har baras KHizan-rut mein

KHushk patte dharti par zard shaal bunte hain

aaj kal na jaane kyun zehn par tanaw hai

TuT-phuT jata hai jo KHayal bunte hain

shahr wale pochhenge kuchh sabab jaddai ka

ghar ke KHali kone bhi kuchh sawal bunte hain

hijr ke manazir ko bhulna hi behtar hai

pyar ki tanabon se phir visal bunte hain

halqa-e-mohabbat mein jo nazir ban jae

aao hum wafaon ki wo misal bunte hain

ab purani baaton ko kya kuredna 'shahid'

bhul kar guzashta ko apna haal bunte hain