koī bhī duniyā meñ apnā ham-navā miltā nahīñ
naġhma-zan haiñ saikḌoñ nauha-sarā miltā nahīñ
haa.e vo din jab ki ronā bhī nashāt-āhañg thā
ab hañsī meñ bhī hameñ koī mazā miltā nahīñ
maiñ miTā kyā pās-e-nāmūs-e-vafā bhī miT gayā
us ke sang-e-āstāñ ko jab.ha-sā miltā nahīñ
tere naġhmoñ se na hogī mujh ko taskīñ andalīb
naġhma-e-ġham se mire naġhma tirā miltā nahīñ
shukr un ke ishq kā lāzim hai ai dil shukr kar
dard to miltā hai dard-e-lā-davā miltā nahīñ
ḳhaak rahtā is hujūm-e-nā-umīdī meñ nishāñ
miT ga.e sab koī naqsh-e-mudda.ā miltā nahīñ
karte ho nazzāra-e-bismil se kyoñ sarf-e-nazar
kyā shahīdān-e-nigah kā ḳhūñ-bahā miltā nahīñ
un kī bazm-e-rāz meñ jā kar ham aise kho ga.e
kuchh patā az-ibtidā-tā-intihā miltā nahīñ
us kā ka.abe meñ na milnā ḳhair ye ik baat hai
but-kadoñ meñ kyoñ vo kāfir āshnā miltā nahīñ
karte haiñ duzdīda nazroñ se vo bismil jis tarah
us adā kā koī ḳhanjar-āzmā miltā nahīñ
jam.a haiñ har chand sāmān-e-masarrat har taraf
chain is dil ko magar tere sivā miltā nahīñ
dekh kar us ko jo sabr aa.e to ham jāneñ 'junūñ'
sabr jab tak hai ki vo sabr-āzmā miltā nahīñ
koi bhi duniya mein apna ham-nawa milta nahin
naghma-zan hain saikDon nauha-sara milta nahin
hae wo din jab ki rona bhi nashat-ahang tha
ab hansi mein bhi hamein koi maza milta nahin
main miTa kya pas-e-namus-e-wafa bhi miT gaya
us ke sang-e-astan ko jabha-sa milta nahin
tere naghmon se na hogi mujh ko taskin andalib
naghma-e-gham se mere naghma tera milta nahin
shukr un ke ishq ka lazim hai ai dil shukr kar
dard to milta hai dard-e-la-dawa milta nahin
KHak rahta is hujum-e-na-umidi mein nishan
miT gae sab koi naqsh-e-muddaa milta nahin
karte ho nazzara-e-bismil se kyon sarf-e-nazar
kya shahidan-e-nigah ka KHun-baha milta nahin
un ki bazm-e-raaz mein ja kar hum aise kho gae
kuchh pata az-ibtida-ta-intiha milta nahin
us ka kabe mein na milna KHair ye ek baat hai
but-kadon mein kyon wo kafir aashna milta nahin
karte hain duzdida nazron se wo bismil jis tarah
us ada ka koi KHanjar-azma milta nahin
jama hain har chand saman-e-masarrat har taraf
chain is dil ko magar tere siwa milta nahin
dekh kar us ko jo sabr aae to hum jaanen 'junun'
sabr jab tak hai ki wo sabr-azma milta nahin
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.