koi chahat hi rahi aur na sauda sar mein

koī chāhat hī rahī aur na saudā sar meñ

ek maqrūz kī mānind paḌe haiñ ghar meñ

jaise paanī se koī phuul ko taaza rakhe

ham ne kuchh dard chhupā rakkhe haiñ chashm-e-tar meñ

ab rihā.ī bhī milegī to sazā hī hogī

nahīñ parvāz kī quvvat mire bāl-o-par meñ

ḳhair ho ḳhair to ab ḳhaar sā khaTke sab ko

ġham to ye hai ki sukūñ bhī nahīñ miltā shar meñ

is qadar ho gayā mash.hūr ye āseb-zada

koī rahtā nahīñ ab aa ke hamāre ghar meñ

ham the nādān luTe dost ke hāthoñ 'jauhar'

kaise pīTeñ ye DhinDhorā bhī zamāne bhar meñ

koi chahat hi rahi aur na sauda sar mein

ek maqruz ki manind paDe hain ghar mein

jaise pani se koi phul ko taza rakhe

hum ne kuchh dard chhupa rakkhe hain chashm-e-tar mein

ab rihai bhi milegi to saza hi hogi

nahin parwaz ki quwwat mere baal-o-par mein

KHair ho KHair to ab KHar sa khaTke sab ko

gham to ye hai ki sukun bhi nahin milta shar mein

is qadar ho gaya mashhur ye aaseb-zada

koi rahta nahin ab aa ke hamare ghar mein

hum the nadan luTe dost ke hathon 'jauhar'

kaise piTen ye DhinDhora bhi zamane bhar mein