koi dekhe to sahi ye sitam-arai bhi

koī dekhe to sahī ye sitam-ārā.ī bhī

ḳhud tamāshā bhī huuñ maiñ aur tamāshā.ī bhī

raaz hai un kā ajab un kī ye yaktā.ī bhī

maiñ tamanna bhī huuñ aur un kā tamannā.ī bhī

haath phailā.ūñ tire hote maiñ kis ke aage

is meñ merī hī nahīñ hai tirī rusvā.ī bhī

aql vāloñ kī nigāhoñ pe paḌe haiñ parde

parda-e-ishq meñ duurī bhī hai yakjā.ī bhī

haal ham ahl-e-ḳhirad kā hai zamāne meñ ajab

ham shanāsā bhī haiñ mahrūm-e-shanāsā.ī bhī

vo to har haal meñ maujūd hai shah-rag ke qarīb

is ko kahte haiñ kahīñ ālam-e-tanhā.ī bhī

koī samjhe bhī to kyā us ko samajh paa.e 'ġhubār'

parda-dārī bhī hai aur anjuman-ārā.ī bhī

koi dekhe to sahi ye sitam-arai bhi

KHud tamasha bhi hun main aur tamashai bhi

raaz hai un ka ajab un ki ye yaktai bhi

main tamanna bhi hun aur un ka tamannai bhi

hath phailaun tere hote main kis ke aage

is mein meri hi nahin hai teri ruswai bhi

aql walon ki nigahon pe paDe hain parde

parda-e-ishq mein duri bhi hai yakjai bhi

haal hum ahl-e-KHirad ka hai zamane mein ajab

hum shanasa bhi hain mahrum-e-shanasai bhi

wo to har haal mein maujud hai shah-rag ke qarib

is ko kahte hain kahin aalam-e-tanhai bhi

koi samjhe bhi to kya us ko samajh pae 'ghubar'

parda-dari bhi hai aur anjuman-arai bhi