koi dil to nahin hai ki Thahar jaega

koī dil to nahīñ hai ki Thahar jā.egā

vaqt ik ḳhvāb-e-ravāñ hai so guzar jā.egā

har guzarte hue lamhe se yahī ḳhauf rahā

hasratoñ se mire dāman ko ye bhar jā.egā

shiddat-e-ġham se milā ziist ko mafhūm nayā

ham samajhte the ki dil jiine se bhar jā.egā

chand lamhoñ kī rifāqat hī ġhanīmat hai ki phir

chand lamhoñ meñ ye shīrāza bikhar jā.egā

apnī yādoñ ko sameTeñge bichhaḌne vaale

kise ma.alūm hai phir kaun kidhar jā.egā

yādeñ rah jā.eñgī aur yādeñ bhī aisī jin kā

zahr āñkhoñ se rag-o-pai meñ utar jā.egā

koi dil to nahin hai ki Thahar jaega

waqt ek KHwab-e-rawan hai so guzar jaega

har guzarte hue lamhe se yahi KHauf raha

hasraton se mere daman ko ye bhar jaega

shiddat-e-gham se mila zist ko mafhum naya

hum samajhte the ki dil jine se bhar jaega

chand lamhon ki rifaqat hi ghanimat hai ki phir

chand lamhon mein ye shiraaza bikhar jaega

apni yaadon ko sameTenge bichhaDne wale

kise malum hai phir kaun kidhar jaega

yaaden rah jaengi aur yaaden bhi aisi jin ka

zahr aankhon se rag-o-pai mein utar jaega