koi din sabr ke phir mundamil ho jaega gham

koī din sabr ke phir mundamil ho jā.egā ġham

nishāñ rah jā.egā aur mustaqil ho jā.egā ġham

kisī lambe safar meñ shaam ho jā.egī ġham ko

kahīñ ik raah takte muzmahil ho jā.egā ġham

kise ma.alūm thā kaam aa.egī sīna-ḳharāshī

aur is siine meñ āḳhir-kār dil ho jā.egā ġham

ufuq par Dūbte dukh se sitāre kah rahe haiñ

chamak uTTheñge ham jab muntaqil ho jā.egā ġham

kisī fursat kī shab dil par udāsī chhā.egī aur

kisī masrūf din par mushtamil ho jā.egā ġham

tumheñ hasrat se ham dekheñge aur tum muskurānā

us ik lamhe meñ jab aa kar muḳhil ho jā.egā ġham

chalegī yaad jab tanhā.ī meñ rauzan khulegā

maza aa jā.egā jab munfa.il ho jā.egā ġham

kahāñ ḳhalvat mayassar aa.egī kam-fursatoñ ko

judā hogī ḳhushī to muttasil ho jā.egā ġham

ḳhushī ik DhūñDne niklegā ġham lekin achānak

baham ho kar kisī ġham se ḳhajil ho jā.egā ġham

koi din sabr ke phir mundamil ho jaega gham

nishan rah jaega aur mustaqil ho jaega gham

kisi lambe safar mein sham ho jaegi gham ko

kahin ek rah takte muzmahil ho jaega gham

kise malum tha kaam aaegi sina-KHarashi

aur is sine mein aaKHir-kar dil ho jaega gham

ufuq par Dubte dukh se sitare kah rahe hain

chamak uTThenge hum jab muntaqil ho jaega gham

kisi fursat ki shab dil par udasi chhaegi aur

kisi masruf din par mushtamil ho jaega gham

tumhein hasrat se hum dekhenge aur tum muskurana

us ek lamhe mein jab aa kar muKHil ho jaega gham

chalegi yaad jab tanhai mein rauzan khulega

maza aa jaega jab munfail ho jaega gham

kahan KHalwat mayassar aaegi kam-fursaton ko

juda hogi KHushi to muttasil ho jaega gham

KHushi ek DhunDne niklega gham lekin achanak

baham ho kar kisi gham se KHajil ho jaega gham