koi faza-e-ah-o-fughan mein nahin raha

koī fazā-e-āh-o-fuġhāñ meñ nahīñ rahā

yā'nī sukūn-e-dil ke jahāñ meñ nahīñ rahā

itnā nahīñ ki sirf mirī maañ nahīñ rahī

maiñ ab ḳhudā ke hifz-o-amāñ meñ nahīñ rahā

is dukh pe mere saath parinde sharīk haiñ

ik peḌ thā jo mere makāñ meñ nahīñ rahā

mujh ko faroḳht kar ke ḳhasāra huā use

sāmāñ jo qīmtī thā dukāñ meñ nahīñ rahā

tum the to ḳhair-o-shar kī samajh-būjh thī hameñ

ab koī lutf sūd-o-ziyāñ meñ nahīñ rahā

koī jahāñ pe aaj hai kal thā vahāñ koī

yā'nī fulāñ meñ jo hai fulāñ meñ nahīñ rahā

ik sabz haath chhū gayā 'miqdād' is tarah

jhaḌne kā ḳhauf ham ko ḳhizāñ meñ nahīñ rahā

koi faza-e-ah-o-fughan mein nahin raha

ya'ni sukun-e-dil ke jahan mein nahin raha

itna nahin ki sirf meri man nahin rahi

main ab KHuda ke hifz-o-aman mein nahin raha

is dukh pe mere sath parinde sharik hain

ek peD tha jo mere makan mein nahin raha

mujh ko faroKHt kar ke KHasara hua use

saman jo qimti tha dukan mein nahin raha

tum the to KHair-o-shar ki samajh-bujh thi hamein

ab koi lutf sud-o-ziyan mein nahin raha

koi jahan pe aaj hai kal tha wahan koi

ya'ni fulan mein jo hai fulan mein nahin raha

ek sabz hath chhu gaya 'miqdad' is tarah

jhaDne ka KHauf hum ko KHizan mein nahin raha