koi hadisa koi waqia na kaha hua na suna hua

koī hādisa koī vāqi'a na kahā huā na sunā huā

vahī choT dil pe lagī huī vahī dard terā diyā huā

ise pesh kar mire nāma-bar ye thakī thakī mirī chashm-e-tar

yahī ek nāma-e-muḳhtasar na likhā huā na paḌhā huā

tirā ḳhat hai yā koī zaḳhm-e-dil kahīñ mundamil kahīñ mustaqil

kahīñ ḳhūn-e-dil se likhā huā kahīñ āñsuoñ se miTā huā

koī mahv-e-husn-o-jamāl thā ki kamāl-e-shauq-e-visāl thā

lab-e-auj-e-sidra-e-muntahā na rukā huā na thakā huā

tire madrasoñ meñ kahāñ rahī vo dil-o-zamīr kī raushnī

terī ḳhānqāh se bū-zarī kā jalāl kab kā havā huā

vahī but-faroshī-o-but-garī vahī jurm-e-sheva-e-āzarī

vahī sāmrī vahī sāhirī vahī tuur sar pe uThā huā

ye sharar sharar rah-e-pur-ḳhatar ye shikasta par ye qafas kā Dar

kabhī is ke dar kabhī us ke dar kabhī dar-ba-dar sā kiyā huā

vo hikāyateñ vo shikāyateñ na kahī huī na sunī huī

ye junūñ kī āh-e-falak-rasā vo charāġh-e-husn bujhā huā

use raas aa na sakī kabhī sar-e-mai-kada tirī be-ruḳhī

vahī terā 'bazmī' vo bāda-kash na jhukā huā na bikā huā

koi hadisa koi waqi'a na kaha hua na suna hua

wahi choT dil pe lagi hui wahi dard tera diya hua

ise pesh kar mere nama-bar ye thaki thaki meri chashm-e-tar

yahi ek nama-e-muKHtasar na likha hua na paDha hua

tera KHat hai ya koi zaKHm-e-dil kahin mundamil kahin mustaqil

kahin KHun-e-dil se likha hua kahin aansuon se miTa hua

koi mahw-e-husn-o-jamal tha ki kamal-e-shauq-e-visal tha

lab-e-auj-e-sidra-e-muntaha na ruka hua na thaka hua

tere madrason mein kahan rahi wo dil-o-zamir ki raushni

teri KHanqah se bu-zari ka jalal kab ka hawa hua

wahi but-faroshi-o-but-gari wahi jurm-e-shewa-e-azari

wahi samri wahi sahiri wahi tur sar pe uTha hua

ye sharar sharar rah-e-pur-KHatar ye shikasta par ye qafas ka Dar

kabhi is ke dar kabhi us ke dar kabhi dar-ba-dar sa kiya hua

wo hikayaten wo shikayaten na kahi hui na suni hui

ye junun ki aah-e-falak-rasa wo charagh-e-husn bujha hua

use ras aa na saki kabhi sar-e-mai-kada teri be-ruKHi

wahi tera 'bazmi' wo baada-kash na jhuka hua na bika hua