koi ho moatabar se moatabar dekha nahin jata

koī ho mo'atabar se mo'atabar dekhā nahīñ jaatā

libās-e-rāhzan meñ rāhbar dekhā nahīñ jaatā

kabhī parvāz thī jin tā.eroñ kī āsmānoñ meñ

zamīñ par ab unheñ be-bāl-o-par dekhā nahīñ jaatā

tumhāre sang-e-dar se uTh ke jaa.eñ to kahāñ jaa.eñ

ki ham se ab kisī kā sang-e-dar dekhā nahīñ jaatā

shuā.eñ husn kī ḳhīra kiye detī haiñ nazroñ ko

vo mahfil meñ haiñ be-parda magar dekhā nahīñ jaatā

urūs-e-shab ke bistar par mahak kar jo hue qurbāñ

unheñ phūloñ ko ab vaqt-e-sahar dekhā nahīñ jaatā

samajhtā huuñ vo zālim bevafā bhī hai sitamgar bhī

magar phir bhī use bā-chashm-e-tar dekhā nahīñ jaatā

marīz-e-ġham kī hālat laakh ho māyūs-kun logo

magar māyūs ham se chārāgar dekhā nahīñ jaatā

havādis par zamāne ke jise hañsnā na aatā ho

hamārī bazm meñ vo nauhagar dekhā nahīñ jaatā

ye kyā kam hai gavāra kar liyā barbādī-e-dil ko

magar ai 'fauq' ab ḳhūn-e-jigar dekhā nahīñ jaatā

koi ho mo'atabar se mo'atabar dekha nahin jata

libas-e-rahzan mein rahbar dekha nahin jata

kabhi parwaz thi jin taeron ki aasmanon mein

zamin par ab unhen be-baal-o-par dekha nahin jata

tumhaare sang-e-dar se uTh ke jaen to kahan jaen

ki hum se ab kisi ka sang-e-dar dekha nahin jata

shuaen husn ki KHira kiye deti hain nazron ko

wo mahfil mein hain be-parda magar dekha nahin jata

urus-e-shab ke bistar par mahak kar jo hue qurban

unhen phulon ko ab waqt-e-sahar dekha nahin jata

samajhta hun wo zalim bewafa bhi hai sitamgar bhi

magar phir bhi use ba-chashm-e-tar dekha nahin jata

mariz-e-gham ki haalat lakh ho mayus-kun logo

magar mayus hum se chaaragar dekha nahin jata

hawadis par zamane ke jise hansna na aata ho

hamari bazm mein wo nauhagar dekha nahin jata

ye kya kam hai gawara kar liya barbaadi-e-dil ko

magar ai 'fauq' ab KHun-e-jigar dekha nahin jata