koi hua na ru-kash Tak meri chashm-e-tar se

koī huā na rū-kash Tak merī chashm-e-tar se

kyā kyā na abr aa kar yaañ zor zor barse

vahshat se merī yaaro ḳhātir na jam.a rakhiyo

phir aave yā na aave nau pur uThā jo ghar se

ab juuñ sarishk un se phirne kī chashm mat rakh

jo ḳhaak meñ mile haiñ gir kar tirī nazar se

dīdār ḳhvāh us ke kam hoñ to shor kam ho

har sub.h ik qayāmat uThtī hai us ke dar se

daaġh ek ho jilā bhī ḳhuuñ ek ho bahā bhī

ab bahs kyā hai dil se kyā guftugū jigar se

dil kis tarah na khīñcheñ ash.ār reḳhte ke

behtar kyā hai maiñ ne us aib ko hunar se

anjām-e-kār bulbul dekhā ham apnī āñkhoñ

āvāra the chaman meñ do chaar TuuTe par se

be-tāqatī ne dil kī āḳhir ko maar rakhā

aafat hamāre jī kī aa.ī hamāre ghar se

dilkash ye manzil āḳhir dekhā to aah niklī

sab yaar jā chuke the aa.e jo ham safar se

āvāra 'mīr' shāyad vaañ ḳhaak ho gayā hai

yak gard uTh chale hai gaah us kī rahguzar se

koi hua na ru-kash Tak meri chashm-e-tar se

kya kya na abr aa kar yan zor zor barse

wahshat se meri yaro KHatir na jama rakhiyo

phir aawe ya na aawe nau pur uTha jo ghar se

ab jun sarishk un se phirne ki chashm mat rakh

jo KHak mein mile hain gir kar teri nazar se

didar KHwah us ke kam hon to shor kam ho

har subh ek qayamat uThti hai us ke dar se

dagh ek ho jila bhi KHun ek ho baha bhi

ab bahs kya hai dil se kya guftugu jigar se

dil kis tarah na khinchen ashaar reKHte ke

behtar kya hai main ne us aib ko hunar se

anjam-e-kar bulbul dekha hum apni aankhon

aawara the chaman mein do chaar TuTe par se

be-taqati ne dil ki aaKHir ko mar rakha

aafat hamare ji ki aai hamare ghar se

dilkash ye manzil aaKHir dekha to aah nikli

sab yar ja chuke the aae jo hum safar se

aawara 'mir' shayad wan KHak ho gaya hai

yak gard uTh chale hai gah us ki rahguzar se