koi imkan to na tha us ka magar chahta tha

koī imkāñ to na thā us kā magar chāhtā thā

kab se koī kisī dīvār meñ dar chāhtā thā

zabt ke peḌ ne gul aur khilā.e ab ke

aur hī tarz kā ye dil to samar chāhtā thā

āḳhirī manzil-e-taskīn-e-dil-o-jān talak

manzileñ raah na kāTeñ ye safar chāhtā thā

chand lamhoñ ke liye jaḌ ko vo sairāb kare

aur shitābī se nikal aa.e samar chāhtā thā

kitnā kam-fahm thā koī ki jalā kar un ko

zindagī par mire ḳhvāboñ kā asar chāhtā thā

ye alag baat ki teshe se shanāsā.ī na thī

vārnā jaan koī tujh pe magar chāhtā thā

hijr ehsās ko shal bhī to kiye rahtā hai

asar us kā koī bā-rañg-e-digar chāhtā thā

us ko sāyoñ ke ta.āqub meñ likhā thā rahnā

dard āñgan meñ ghanā ek shajar chāhtā thā

ek gahrī sī nazar rauzan-e-dil ke andar

dasht-e-ehsās kahāñ shams o qamar chāhtā thā

āñdhiyāñ dosh pe le kar vo uḌā phirtā ho

aur salāmat bhī rahe kāñch-nagar chāhtā thā

koi imkan to na tha us ka magar chahta tha

kab se koi kisi diwar mein dar chahta tha

zabt ke peD ne gul aur khilae ab ke

aur hi tarz ka ye dil to samar chahta tha

aaKHiri manzil-e-taskin-e-dil-o-jaan talak

manzilen rah na kaTen ye safar chahta tha

chand lamhon ke liye jaD ko wo sairab kare

aur shitabi se nikal aae samar chahta tha

kitna kam-fahm tha koi ki jala kar un ko

zindagi par mere KHwabon ka asar chahta tha

ye alag baat ki teshe se shanasai na thi

warna jaan koi tujh pe magar chahta tha

hijr ehsas ko shal bhi to kiye rahta hai

asar us ka koi ba-rang-e-digar chahta tha

us ko sayon ke taaqub mein likha tha rahna

dard aangan mein ghana ek shajar chahta tha

ek gahri si nazar rauzan-e-dil ke andar

dasht-e-ehsas kahan shams o qamar chahta tha

aandhiyan dosh pe le kar wo uDa phirta ho

aur salamat bhi rahe kanch-nagar chahta tha