koi KHwab tha jo bikhar gaya koi dard tha jo Thahar gaya

koī ḳhvāb thā jo bikhar gayā koī dard thā jo Thahar gayā

magar is kā koī bhī ġham nahīñ jo guzar gayā so guzar gayā

ye dil-o-nazar kā mo.āmla bhī bahut ajīb-o-ġharīb hai

kabhī in laboñ pe hañsī rahī kabhī ashk aañkh meñ bhar gayā

maiñ zabāñ se kuchh bhī na kah sakā vo nazar se kuchh na samajh sakā

na mire hī dil se jhijak ga.ī na to us ke dil se hī Dar gayā

kabhī tujh se bhī na sambhal sakā kabhī mujh se bhī na sambhal sakā

tirā aa.ina bhī bikhar gayā mirā aa.ina bhī bikhar gayā

tujhe hogā us kā malāl kyā mujhe hogā us kā ḳhayāl kyā

tire husn se bhī kashish ga.ī mire ishq se bhī asar gayā

vo hasīn chehroñ kī bhiiḌ thī ki nazar bhaTaktī hī rah ga.ī

tirī justujū kā nasha thā jo kisī moḌ par vo utar gayā

ye jo rañg-e-fikr-o-ḳhayāl hai ye tirī nazar kā kamāl hai

tirā husn thā koī aa.ina jise dekh kar maiñ sañvar gayā

koi KHwab tha jo bikhar gaya koi dard tha jo Thahar gaya

magar is ka koi bhi gham nahin jo guzar gaya so guzar gaya

ye dil-o-nazar ka moamla bhi bahut ajib-o-gharib hai

kabhi in labon pe hansi rahi kabhi ashk aankh mein bhar gaya

main zaban se kuchh bhi na kah saka wo nazar se kuchh na samajh saka

na mere hi dil se jhijak gai na to us ke dil se hi Dar gaya

kabhi tujh se bhi na sambhal saka kabhi mujh se bhi na sambhal saka

tera aaina bhi bikhar gaya mera aaina bhi bikhar gaya

tujhe hoga us ka malal kya mujhe hoga us ka KHayal kya

tere husn se bhi kashish gai mere ishq se bhi asar gaya

wo hasin chehron ki bhiD thi ki nazar bhaTakti hi rah gai

teri justuju ka nasha tha jo kisi moD par wo utar gaya

ye jo rang-e-fikr-o-KHayal hai ye teri nazar ka kamal hai

tera husn tha koi aaina jise dekh kar main sanwar gaya