koi kinaya kahin aur baat karte hue

koī kināya kahīñ aur baat karte hue

koī ishāra zarā duur se guzarte hue

mire lahū kī lapak meñ rahe vo haath vo paañv

kuchh aa.ine se kahīñ Dūbte ubharte hue

sharār-e-bosa hī us sañg-e-lab se ho paidā

ki mere sar meñ ka.ī lafz haiñ ThiThurte hue

na saḳht-gīr thā vo aur na maiñ hī be-himmat

par us ko haath lagāyā hai aaj Darte hue

jalā.eñge nam-e-sāhil pe kashtiyāñ apnī

is āb-zār-e-tamāshā meñ paañv dharte hue

guzar hī jā.egī sar se kahīñ to mauj-e-havas

kabhī to sharm use aa.egī mukarte hue

havās meñ haiñ kahīñ ḳhauf ke nasheb o farāz

jo ḳhud se bhāgtā huuñ raah meñ Thaharte hue

ye kaam aur to ab kaun hī karegā yahāñ

sameTtā bhī rahūñ jism ko bikharte hue

mujhe to rañj thā sab se kahīñ ziyāda 'zafar'

jo dekh letā mirī samt bhī vo marte hue

koi kinaya kahin aur baat karte hue

koi ishaara zara dur se guzarte hue

mere lahu ki lapak mein rahe wo hath wo panw

kuchh aaine se kahin Dubte ubharte hue

sharar-e-bosa hi us sang-e-lab se ho paida

ki mere sar mein kai lafz hain ThiThurte hue

na saKHt-gir tha wo aur na main hi be-himmat

par us ko hath lagaya hai aaj Darte hue

jalaenge nam-e-sahil pe kashtiyan apni

is aab-zar-e-tamasha mein panw dharte hue

guzar hi jaegi sar se kahin to mauj-e-hawas

kabhi to sharm use aaegi mukarte hue

hawas mein hain kahin KHauf ke nasheb o faraaz

jo KHud se bhagta hun rah mein Thaharte hue

ye kaam aur to ab kaun hi karega yahan

sameTta bhi rahun jism ko bikharte hue

mujhe to ranj tha sab se kahin ziyaada 'zafar'

jo dekh leta meri samt bhi wo marte hue