koi mai de ya na de hum rind-e-be-parwa hain aap

koī mai de yā na de ham riñd-e-be-parvā haiñ aap

sāqiyā apnī baġhal meñ shīsha-e-sahbā haiñ aap

ġhāfil o hoshyār vo timsāl-e-yak-ā.īna haiñ

varta-e-hairat meñ nādāñ aap haiñ daanā haiñ aap

kyuuñ rahe merī duā minnat-kash-e-bāl-e-malak

nāla-e-mastāna mere āsmāñ-paimā haiñ aap

hai ta.ajjub ḳhizr ko aur āb-e-haivāñ kī talab

aur phir uzlat-guzīn-e-dāman-e-sahrā haiñ aap

manzil-e-tūl-e-amal darpesh aur mohlat hai kam

raah kis se pūchhiye hairat meñ naqsh-e-pā haiñ aap

haq se tālib diid ke hoñ ham basīr aise nahīñ

ham ko jo kotah-nazar samjheñ vo nā-bīnā haiñ aap

gul hama-tan-zaḳhm haiñ phir bhī hama-tan-gosh haiñ

be-asar kuchh nāla-hā-e-bulbul-e-shaidā haiñ aap

hirs se shikva karūñ kyā haath phailāne kā maiñ

kahtī hai vo apne hāthoñ ḳhalq meñ rusvā haiñ aap

ham se ai ahl-e-tana.a.um muñh chhupānā chāhiye

dam bharā karte haiñ ham aur ā.ina-sīmā haiñ aap

koi mai de ya na de hum rind-e-be-parwa hain aap

saqiya apni baghal mein shisha-e-sahba hain aap

ghafil o hoshyar wo timsal-e-yak-aina hain

warta-e-hairat mein nadan aap hain dana hain aap

kyun rahe meri dua minnat-kash-e-baal-e-malak

nala-e-mastana mere aasman-paima hain aap

hai tajjub KHizr ko aur aab-e-haiwan ki talab

aur phir uzlat-guzin-e-daman-e-sahra hain aap

manzil-e-tul-e-amal darpesh aur mohlat hai kam

rah kis se puchhiye hairat mein naqsh-e-pa hain aap

haq se talib did ke hon hum basir aise nahin

hum ko jo kotah-nazar samjhen wo na-bina hain aap

gul hama-tan-zaKHm hain phir bhi hama-tan-gosh hain

be-asar kuchh nala-ha-e-bulbul-e-shaida hain aap

hirs se shikwa karun kya hath phailane ka main

kahti hai wo apne hathon KHalq mein ruswa hain aap

hum se ai ahl-e-tanaum munh chhupana chahiye

dam bhara karte hain hum aur aaina-sima hain aap