koi manzil bhi nahin hai koi rasta bhi nahin

koī manzil bhī nahīñ hai koī rasta bhī nahīñ

aur sab mahv-e-safar haiñ koī ruktā bhī nahīñ

har taraf be-rañg sī gahrī udāsī kā jamāv

ek rañgīñ ḳhvāb jo nazroñ se haTtā bhī nahīñ

kis tarah thāme hue haiñ ḳhud ko us bastī ke log

koī mutavāzin nahīñ hai aur phisaltā bhī nahīñ

ik musalsal sī ye sa.ī-e-rā.igāñ ye kāvisheñ

ek patthar sā ye manzar jo pighaltā bhī nahīñ

be-sabab sī Tiis dil meñ mustaqil hotī huī

jazba-e-bebāk jo dil meñ utartā bhī nahīñ

har taraf ye dhuup har-dam tez-tar hotī huī

mom kā ik shahr lekin jo pighaltā bhī nahīñ

koi manzil bhi nahin hai koi rasta bhi nahin

aur sab mahw-e-safar hain koi rukta bhi nahin

har taraf be-rang si gahri udasi ka jamaw

ek rangin KHwab jo nazron se haTta bhi nahin

kis tarah thame hue hain KHud ko us basti ke log

koi mutawazin nahin hai aur phisalta bhi nahin

ek musalsal si ye sai-e-raigan ye kawishen

ek patthar sa ye manzar jo pighalta bhi nahin

be-sabab si Tis dil mein mustaqil hoti hui

jazba-e-bebak jo dil mein utarta bhi nahin

har taraf ye dhup har-dam tez-tar hoti hui

mom ka ek shahr lekin jo pighalta bhi nahin