koi maqam nahin hadd-e-eatibar ke baad

koī maqām nahīñ hadd-e-e.atibār ke ba.ad

kahāñ maiñ sajda karūñ āstān-e-yār ke ba.ad

uThūñ to jā.ūñ kahāñ jā-e-pur-bahār ke ba.ad

kahīñ panāh nahīñ un kī rahguzār ke ba.ad

kahāñ kā azm hai ai dil husūl-e-kār ke ba.ad

ab aur bhī koī ka.aba hai kū-e-yār ke ba.ad

tabāh ham hue bīm-o-rajā meñ āḳhir-e-kār

kuchh intizār se pahle kuchh intizār ke ba.ad

gilā nahīñ hai jafā kā magar savāl ye hai

satā.eñge kise phir aap jāñ-nisār ke ba.ad

kise ḳhabar hai ki guzregī is asiir pe kyā

qafas mile jise rañgīnī-e-bahār ke ba.ad

sahar ke hote hī ruḳhsat huā marīz-e-firāq

jahāñ meñ kaam hī kyā thā ab intizār ke ba.ad

kisī se mashvara-e-tark-e-ishq 'saif' na kar

na sun kisī kī dil āzmūda-kār ke ba.ad

koi maqam nahin hadd-e-eatibar ke baad

kahan main sajda karun aastan-e-yar ke baad

uThun to jaun kahan ja-e-pur-bahaar ke baad

kahin panah nahin un ki rahguzar ke baad

kahan ka azm hai ai dil husul-e-kar ke baad

ab aur bhi koi kaba hai ku-e-yar ke baad

tabah hum hue bim-o-raja mein aaKHir-e-kar

kuchh intizar se pahle kuchh intizar ke baad

gila nahin hai jafa ka magar sawal ye hai

sataenge kise phir aap jaan-nisar ke baad

kise KHabar hai ki guzregi is asir pe kya

qafas mile jise rangini-e-bahaar ke baad

sahar ke hote hi ruKHsat hua mariz-e-firaq

jahan mein kaam hi kya tha ab intizar ke baad

kisi se mashwara-e-tark-e-ishq 'saif' na kar

na sun kisi ki dil aazmuda-kar ke baad