koi mehrban nahin sath mein koi hat bhi nahin hat mein

koī mehrbāñ nahīñ saath meñ koī haat bhī nahīñ haat meñ

haiñ udāsiyāñ mirī muntazir sabhī rāstoñ meñ jihāt meñ

hai ḳhabar mujhe ki ye tum nahīñ kasī ajnabī ko bhī kyā paḌī

sabhī āshnā bhī haiñ rū-ba-rū to ye kaun hai mirī ghaat meñ

ye udāsiyoñ kā jo rañg hai koī ho na ho mire sañg hai

mire sher meñ mirī baat meñ mirī ādatoñ meñ sifāt meñ

kareñ e'tibār kisī pe kyā ki ye shahr shahr-e-nifāq hai

jahāñ muskurāte haiñ lab kahīñ vahīñ tanz hai kisī baat meñ

chalo ye bhī maanā ai ham-navā ki taġhayyurāt ke mā-sivā

nahīñ mustaqil koī shai yahāñ to ye hijr kyuuñ hai sabāt meñ

mirī dastaras meñ bhī kuchh nahīñ, nahīñ tere bas meñ bhī kuchh nahīñ

maiñ asīr-e-kākul-e-ishq huuñ mujhe kyā milegā najāt meñ

koi mehrban nahin sath mein koi hat bhi nahin hat mein

hain udasiyan meri muntazir sabhi raston mein jihat mein

hai KHabar mujhe ki ye tum nahin kasi ajnabi ko bhi kya paDi

sabhi aashna bhi hain ru-ba-ru to ye kaun hai meri ghat mein

ye udasiyon ka jo rang hai koi ho na ho mere sang hai

mere sher mein meri baat mein meri aadaton mein sifat mein

karen e'tibar kisi pe kya ki ye shahr shahr-e-nifaq hai

jahan muskuraate hain lab kahin wahin tanz hai kisi baat mein

chalo ye bhi mana ai ham-nawa ki taghayyuraat ke ma-siwa

nahin mustaqil koi shai yahan to ye hijr kyun hai sabaat mein

meri dastaras mein bhi kuchh nahin, nahin tere bas mein bhi kuchh nahin

main asir-e-kakul-e-ishq hun mujhe kya milega najat mein