koi mere pas nahin hai aur na kisi ka hasil main

koī mere paas nahīñ hai aur na kisī kā hāsil maiñ

lahreñ aa kar sar paTkeñgī tanhā tanhā sāhil maiñ

kyā paayā hai kyā bāñTā hai apne apne zarf kī baat

tū ne merī hañsī uḌaa.ī tere dukhoñ meñ shāmil maiñ

agle qadam pe andhā kuaañ thā is kā mujh ko ilm bhī thā

lekin maiñ ne raah na badlī apne aap kā qātil maiñ

bichhaḌ gayā par aas hai mujh ko ik din tujh se milnā hai

terī zaat kā mehvar thā maiñ tere safar kī manzil maiñ

ujle bistar par tanhā.ī pyāse hoñToñ par cigarette

paḌhte paḌhte so jaatā huuñ ibn-e-safī kā novel maiñ

rasta manzil ḳhalvat mahfil mahkeñ terī yādoñ se

lamha-lamha tujh ko sochā tujh se rahā kab ġhāfil maiñ

koi mere pas nahin hai aur na kisi ka hasil main

lahren aa kar sar paTkengi tanha tanha sahil main

kya paya hai kya banTa hai apne apne zarf ki baat

tu ne meri hansi uDai tere dukhon mein shamil main

agle qadam pe andha kuan tha is ka mujh ko ilm bhi tha

lekin main ne rah na badli apne aap ka qatil main

bichhaD gaya par aas hai mujh ko ek din tujh se milna hai

teri zat ka mehwar tha main tere safar ki manzil main

ujle bistar par tanhai pyase honTon par cigarette

paDhte paDhte so jata hun ibn-e-safi ka nowel main

rasta manzil KHalwat mahfil mahken teri yaadon se

lamha-lamha tujh ko socha tujh se raha kab ghafil main