koi nahin hai rashk-e-masiha kahen jise

koī nahīñ hai rashk-e-masīhā kaheñ jise

lekin hai dīd-e-yār mudāvā kaheñ jise

kiije zarūr zikr mirā jā-ba-jā magar

aisā na ho vo zikr ki shikva kaheñ jise

gesū-e-yār ruḳh pe ghaTā ban ke chhā ga.e

ye tīrgī hai yā shab-e-yaldā kaheñ jise

un kī nazar badalte hī duniyā badal ga.ī

sehr-e-nazar kaheñ yā karishma kaheñ jise

tum kyā ga.e ki dil bhī gayā jaan bhī ga.ī

ye hai dil aur jaan ye qabza kaheñ jise

karnā hai kaam kiije vahī is jahān maiñ

apne to apne ġhair bhī achchhā kaheñ jise

ab us ko bhī mahārat-e-fan kā ġhurūr hai

duniyā-e-fan kā kāġhaz-e-sāda kaheñ jise

sahrā-navard aaj bhī hai dekhiye huzūr

'ḳhākī' kaheñ yā aap kā shaidā kaheñ jise

koi nahin hai rashk-e-masiha kahen jise

lekin hai did-e-yar mudawa kahen jise

kije zarur zikr mera ja-ba-ja magar

aisa na ho wo zikr ki shikwa kahen jise

gesu-e-yar ruKH pe ghaTa ban ke chha gae

ye tirgi hai ya shab-e-yalda kahen jise

un ki nazar badalte hi duniya badal gai

sehr-e-nazar kahen ya karishma kahen jise

tum kya gae ki dil bhi gaya jaan bhi gai

ye hai dil aur jaan ye qabza kahen jise

karna hai kaam kije wahi is jahan main

apne to apne ghair bhi achchha kahen jise

ab us ko bhi mahaarat-e-fan ka ghurur hai

duniya-e-fan ka kaghaz-e-sada kahen jise

sahra-naward aaj bhi hai dekhiye huzur

'KHaki' kahen ya aap ka shaida kahen jise