koi rasta koi rahraw koi apna nahin milta

koī rasta koī rahrav koī apnā nahīñ miltā

mohabbat ke musāfir ko kahīñ saaya nahīñ miltā

mirī āñkhoñ se ashkoñ ke bajā.e ret girtī hai

magar andar kahīñ bhī ret kā dariyā nahīñ miltā

baḌī sāda-dilī se ek din bachche ne ye pūchhā

koī bhī shaḳhs is duniyā meñ kyuuñ hañstā nahīñ miltā

hameñ har pal tumhārī hī kamī mahsūs hotī hai

tumhārī yaad se ġhāfil koī lamha nahīñ miltā

ḳhayāloñ meñ ka.ī kirdār mujh se roz milte haiñ

haqīqat meñ magar aisā koī chehra nahīñ miltā

ajab jalva-numā.ī hai jidhar dekhūñ tumhī tum ho

mujhe to aa.ine meñ aks bhī merā nahīñ miltā

maiñ miTTī se bane murda badan ko le ke phirtā huuñ

magar is shahr meñ 'ansar' dam-e-īsā nahīñ miltā

koi rasta koi rahraw koi apna nahin milta

mohabbat ke musafir ko kahin saya nahin milta

meri aankhon se ashkon ke bajae ret girti hai

magar andar kahin bhi ret ka dariya nahin milta

baDi sada-dili se ek din bachche ne ye puchha

koi bhi shaKHs is duniya mein kyun hansta nahin milta

hamein har pal tumhaari hi kami mahsus hoti hai

tumhaari yaad se ghafil koi lamha nahin milta

KHayalon mein kai kirdar mujh se roz milte hain

haqiqat mein magar aisa koi chehra nahin milta

ajab jalwa-numai hai jidhar dekhun tumhi tum ho

mujhe to aaine mein aks bhi mera nahin milta

main miTTi se bane murda badan ko le ke phirta hun

magar is shahr mein 'ansar' dam-e-isa nahin milta