koi sada na dur talak naqsh-e-pa koi

koī sadā na duur talak naqsh-e-pā koī

vo moḌ hai ki miltā nahīñ rāstā koī

haañ dil kī dhaḌkanoñ se sadā chhīn lo magar

chup-chāp hī jo aa ke yahāñ bas gayā koī

maanā ki tere dar pe jhukīñ aa ke manzileñ

par ham sā bhī milā tujhe sach sach batā, koī

dil kī zabāñ bahut hai koī ho jo ahl-e-dil

hoñToñ se kyā batā.e bhalā mudda.ā koī

āñkheñ jo band kiiñ to vo ubhre haiñ āftāb

bāhar kī dhuup se na rahā vāsta koī

hairān ho ke dil se ye pūchhā nigāh ne

kyā vāqa.ī milā na tujhe āshnā koī

yā āsmān tak nahīñ jaatī mirī navā

yā āsmāñ pe suntā nahīñ hai navā koī

jitne ḳhayāl utne hī rañgoñ ke dā.ere

miltā nahīñ kisī se kahīñ silsila koī

us sāda-dil ko kyā ḳhabar is ūñch-nīch kī

'anjum' ke paas jā ke bane kyā baḌā koī

koi sada na dur talak naqsh-e-pa koi

wo moD hai ki milta nahin rasta koi

han dil ki dhaDkanon se sada chhin lo magar

chup-chap hi jo aa ke yahan bas gaya koi

mana ki tere dar pe jhukin aa ke manzilen

par hum sa bhi mila tujhe sach sach bata, koi

dil ki zaban bahut hai koi ho jo ahl-e-dil

honTon se kya batae bhala muddaa koi

aankhen jo band kin to wo ubhre hain aaftab

bahar ki dhup se na raha wasta koi

hairan ho ke dil se ye puchha nigah ne

kya waqai mila na tujhe aashna koi

ya aasman tak nahin jati meri nawa

ya aasman pe sunta nahin hai nawa koi

jitne KHayal utne hi rangon ke daere

milta nahin kisi se kahin silsila koi

us sada-dil ko kya KHabar is unch-nich ki

'anjum' ke pas ja ke bane kya baDa koi