koi samjhe dard kya naKHchir ka

koī samjhe dard kyā naḳhchīr kā

falsafa 'ġhālib' kā aur ġham 'mīr' kā

bas ta'āruf Thos honā chāhiye

tarjumāñ har she'r hai tāsīr kā

zindagī kā kuchh bhī to hāsil nahīñ

haañ magar ik naaz hai tahrīr kā

kaun aa.egā mirī turbat pe ab

kyā banegā ḳhaak kī taqdīr kā

ham hī kyoñ barpā kareñ tūfān-e-ġham

us ne kab sochā dil-e-dil-gīr kā

aane vaale kī ḳhabar aatī nahīñ

kyā sabab qāsid kī is tāḳhīr kā

us ne to dekhā nahīñ jī bhar ke bhī

zaḳhm thā taqdīr meñ taqsīr kā

kyā huī insāniyat 'jogī' tirī

kyā banā us ḳhvāb kī tā'bīr kā

koi samjhe dard kya naKHchir ka

falsafa 'ghaalib' ka aur gham 'mir' ka

bas ta'aruf Thos hona chahiye

tarjuman har she'r hai tasir ka

zindagi ka kuchh bhi to hasil nahin

han magar ek naz hai tahrir ka

kaun aaega meri turbat pe ab

kya banega KHak ki taqdir ka

hum hi kyon barpa karen tufan-e-gham

us ne kab socha dil-e-dil-gir ka

aane wale ki KHabar aati nahin

kya sabab qasid ki is taKHir ka

us ne to dekha nahin ji bhar ke bhi

zaKHm tha taqdir mein taqsir ka

kya hui insaniyat 'jogi' teri

kya bana us KHwab ki ta'bir ka