koi shama aur koi parwana hoga

koī sham.a aur koī parvāna hogā

jahāñ meñ ishq kā afsāna hogā

junūn-e-ishq se hai lutf-e-hastī

vo dīvāna hai jo farāzānā hogā

tire mastoñ kā ai kausar ke saaqī

vahī paimāñ vahī paimāna hogā

ḳharābāt-e-jahāñ vaqf-e-fanā hai

magar baaqī tirā mai-ḳhāna hogā

ravāñ haiñ kārvāñ jis kī taraf sab

yahī vo kūcha-e-jānāna hogā

vo dil hī kyā ki raqs-e-mauj jis kā

harīf-e-jumbish-e-dariyā na hogā

vabāl-e-dosh hai vo sar ki jis meñ

kisī ke ishq kā saudā na hogā

jise shahd-o-shakar kī aarzū hai

lab-e-noshīñ kā vo rasiyā na hogā

mohabbat ke haiñ rañgā-rañg nairañg

kahīñ afsūñ kahīñ afsāna hogā

parastārī hai tīnat meñ bashar kī

jahāñ ka.aba nahīñ but-ḳhāna hogā

payāmī se kisī ne kah diyā hai

ki 'nāzir' se koī parvāna hogā

koi shama aur koi parwana hoga

jahan mein ishq ka afsana hoga

junun-e-ishq se hai lutf-e-hasti

wo diwana hai jo faraazana hoga

tere maston ka ai kausar ke saqi

wahi paiman wahi paimana hoga

KHarabaat-e-jahan waqf-e-fana hai

magar baqi tera mai-KHana hoga

rawan hain karwan jis ki taraf sab

yahi wo kucha-e-jaanana hoga

wo dil hi kya ki raqs-e-mauj jis ka

harif-e-jumbish-e-dariya na hoga

wabaal-e-dosh hai wo sar ki jis mein

kisi ke ishq ka sauda na hoga

jise shahd-o-shakar ki aarzu hai

lab-e-noshin ka wo rasiya na hoga

mohabbat ke hain ranga-rang nairang

kahin afsun kahin afsana hoga

parastari hai tinat mein bashar ki

jahan kaba nahin but-KHana hoga

payami se kisi ne kah diya hai

ki 'nazir' se koi parwana hoga