koi shisha nahin sharab nahin

koī shīsha nahīñ sharāb nahīñ

shām-e-hijrāñ tirā javāb nahīñ

jaane kyoñ aadmī ke chehre par

ab vo pahlī sī āb-o-tāb nahīñ

ḳhāmushī bhī hai be-misāl tirī

terī bātoñ kā bhī javāb nahīñ

mere sāġhar meñ laala guuñ sī vo shai

ḳhūn-e-dil hai mirā sharāb nahīñ

har koī jis ko paḌh sake ai dost

zindagī vo khulī kitāb nahīñ

aur sab terī bazm-e-nāz meñ haiñ

ik tirā ḳhānumāñ-ḳharāb nahīñ

fasl-e-gul meñ ye shāḳh-e-gul pe kañval

dekhtā huuñ koī gulāb nahīñ

koi shisha nahin sharab nahin

sham-e-hijran tera jawab nahin

jaane kyon aadmi ke chehre par

ab wo pahli si aab-o-tab nahin

KHamushi bhi hai be-misal teri

teri baaton ka bhi jawab nahin

mere saghar mein lala gun si wo shai

KHun-e-dil hai mera sharab nahin

har koi jis ko paDh sake ai dost

zindagi wo khuli kitab nahin

aur sab teri bazm-e-naz mein hain

ek tera KHanuman-KHarab nahin

fasl-e-gul mein ye shaKH-e-gul pe kanwal

dekhta hun koi gulab nahin