koi suragh koi naqsh-e-pa nahin milta

koī surāġh koī naqsh-e-pā nahīñ miltā

tumhāre shahr kā ab rāsta nahīñ miltā

kaho to tum ko ḳhudā maan leñ mohabbat kā

ki ham ko tum sā koī dūsrā nahīñ miltā

ye dasht-e-hijr kī vahshat hai sāhibān-e-vafā

yahāñ kisī ko koī aasrā nahīñ miltā

suno hameñ hī jalā do ki raushnī ke liye

hamāre shahr ko koī diyā nahīñ miltā

havā ne kar diyā pāmāl raushnī kā badan

charāġh-e-bām kā koī pata nahīñ miltā

hameñ to jis ne pukārā ḳhudā lagā ham ko

vo kaun log haiñ jin ko ḳhudā nahīñ miltā

jahāñ pe kaaTī thī tāzīr-e-ābla-pā.ī

yahīñ kahīñ thā koī dasht sā nahīñ miltā

ajiib shahr hai kūfa-mizāj logoñ kā

koī bhī shaḳhs qarīn-e-vafā nahīñ miltā

ye vahshatoñ ko baḌhāne kā vaqt hai shāh-jī

ki ḳhushbūoñ kā koī silsila nahīñ miltā

koi suragh koi naqsh-e-pa nahin milta

tumhaare shahr ka ab rasta nahin milta

kaho to tum ko KHuda man len mohabbat ka

ki hum ko tum sa koi dusra nahin milta

ye dasht-e-hijr ki wahshat hai sahiban-e-wafa

yahan kisi ko koi aasra nahin milta

suno hamein hi jala do ki raushni ke liye

hamare shahr ko koi diya nahin milta

hawa ne kar diya pamal raushni ka badan

charagh-e-baam ka koi pata nahin milta

hamein to jis ne pukara KHuda laga hum ko

wo kaun log hain jin ko KHuda nahin milta

jahan pe kaTi thi tazir-e-abla-pai

yahin kahin tha koi dasht sa nahin milta

ajib shahr hai kufa-mizaj logon ka

koi bhi shaKHs qarin-e-wafa nahin milta

ye wahshaton ko baDhane ka waqt hai shah-ji

ki KHushbuon ka koi silsila nahin milta