koi tadbir kargar na hui

koī tadbīr kārgar na huī

shāḳh-e-ummīd pur-samar na huī

baḌh gayā aur dard-e-soz-o-gudāz

kārgar fikr-e-chārāgar na huī

tāb-e-nazāra koī lā na sakā

is liye aap ko nazar na huī

kaun se din tire tasavvur se

merī shab rū-kash-e-sahar na huī

jis ko dekhā usī kā kaam kiyā

teġh-e-burrāñ huī nazar na huī

us ko manzil kī kyā ḳhabar jis kī

nigah-e-lutf rāhbar na huī

sa.ī-e-be-kār kā maza aaya

kāmyābī hameñ agar na huī

be-ḳhudī kā koī Thikānā hai

koī aayā hameñ ḳhabar na huī

jis ne us kī koī ḳhabar paa.ī

us ko apnī kabhī ḳhabar na huī

us ko kyā iid kā maza aaya

iid jis ġham-zada kī ghar na huī

hijr kī shab bhī kyā qayāmat thī

umr guzrī magar sahar na huī

lutf se jis ne tum ko dekh liyā

us ko taskīn umr bhar na huī

naala sharminda-e-kashish na huā

aah minnat-kash-e-asar na huī

umr bhar roz-o-shab guzarte rahe

ḳhatm rūdād-e-ġham magar na huī

jaan jin ko aziiz thī 'as.ad'

un se tai rāh-e-pur-ḳhatar na huī

koi tadbir kargar na hui

shaKH-e-ummid pur-samar na hui

baDh gaya aur dard-e-soz-o-gudaz

kargar fikr-e-chaaragar na hui

tab-e-nazara koi la na saka

is liye aap ko nazar na hui

kaun se din tere tasawwur se

meri shab ru-kash-e-sahar na hui

jis ko dekha usi ka kaam kiya

tegh-e-burran hui nazar na hui

us ko manzil ki kya KHabar jis ki

nigah-e-lutf rahbar na hui

sai-e-be-kar ka maza aaya

kaamyabi hamein agar na hui

be-KHudi ka koi Thikana hai

koi aaya hamein KHabar na hui

jis ne us ki koi KHabar pai

us ko apni kabhi KHabar na hui

us ko kya id ka maza aaya

id jis gham-zada ki ghar na hui

hijr ki shab bhi kya qayamat thi

umr guzri magar sahar na hui

lutf se jis ne tum ko dekh liya

us ko taskin umr bhar na hui

nala sharminda-e-kashish na hua

aah minnat-kash-e-asar na hui

umr bhar roz-o-shab guzarte rahe

KHatm rudad-e-gham magar na hui

jaan jin ko aziz thi 'asad'

un se tai rah-e-pur-KHatar na hui