koi taklif hamari hai na gham aap ke hain

koī taklīf hamārī hai na ġham aap ke haiñ

aaj se aap hamāre haiñ na ham aap ke haiñ

ye haqīqat hai bahut jaur-o-sitam aap ke haiñ

phir bhī īmān se kahte haiñ ki ham aap ke haiñ

ik bahāna hameñ mil jā.egā jiine ke liye

uuprī dil hī se kah dījiye ham aap ke haiñ

yak-ba-yak merī jabīñ meñ taḌap uTThe sajde

maiñ samajhtā huuñ yahāñ naqsh-e-qadam aap ke haiñ

ba.az auqāt ḳhushī jaan pe ban jaatī hai

ham se hargiz na kaheñ aap ki ham aap ke haiñ

jazba-e-ishq to mub.ham kabhī hotā hī nahīñ

aap kī zid pe kahe dete haiñ ham aap ke haiñ

ham bhī haiñ kār-e-ḳhudā.ī meñ barābar ke sharīk

aap kahte haiñ to ye lauh-o-qalam aap ke haiñ

chuTkiyāñ leñ dil-e-be-tāb meñ to hañs hañs kar

kitne ma.asūm ye andāz-e-sitam aap ke haiñ

ham vafā-keshoñ ke dam se hai ye satvat ye uruuj

aap ke ham haiñ to ye jāh-o-hasham aap ke haiñ

ham se kahte haiñ ki ta.abīr batānā is kī

ḳhvāb meñ ham ne qasam khaa.ī hai ham aap ke haiñ

aap lillāh ilāj-e-ġham-e-daurāñ na kareñ

ġham-e-daurāñ se kahīñ baḌh ke sitam aap ke haiñ

araq-ālūd jabīñ nīchī nazar kāñpte lab

isī aalam meñ phir ik baar ki ham aap ke haiñ

koi taklif hamari hai na gham aap ke hain

aaj se aap hamare hain na hum aap ke hain

ye haqiqat hai bahut jaur-o-sitam aap ke hain

phir bhi iman se kahte hain ki hum aap ke hain

ek bahana hamein mil jaega jine ke liye

upri dil hi se kah dijiye hum aap ke hain

yak-ba-yak meri jabin mein taDap uTThe sajde

main samajhta hun yahan naqsh-e-qadam aap ke hain

baz auqat KHushi jaan pe ban jati hai

hum se hargiz na kahen aap ki hum aap ke hain

jazba-e-ishq to mubham kabhi hota hi nahin

aap ki zid pe kahe dete hain hum aap ke hain

hum bhi hain kar-e-KHudai mein barabar ke sharik

aap kahte hain to ye lauh-o-qalam aap ke hain

chuTkiyan len dil-e-be-tab mein to hans hans kar

kitne masum ye andaz-e-sitam aap ke hain

hum wafa-keshon ke dam se hai ye satwat ye uruj

aap ke hum hain to ye jah-o-hasham aap ke hain

hum se kahte hain ki tabir batana is ki

KHwab mein hum ne qasam khai hai hum aap ke hain

aap lillah ilaj-e-gham-e-dauran na karen

gham-e-dauran se kahin baDh ke sitam aap ke hain

araq-alud jabin nichi nazar kanpte lab

isi aalam mein phir ek bar ki hum aap ke hain